متلملمه كلمتى من ندى بلدى
عشان تقولك مرحبا ولدى
البيت دا بيتك
مانتش من الاغراب
حبيب وكاتباك على جبينها اعز احباب
فارده دراعتها وفتحه الباب
وقفه بتستقبلك رخيا عليك الاهداب
عزيز ومن قلبها رشالك الاعتاب
************************
مصر شايللاك محبه
اد الى عرفوها البشر
واد الى لسه ماعرفوهاش
اد الى راح من عمرها
واد الى لسه مجاش
اد حروف النقش:
عل جدار المعابد والاعمده
اد الحب الى ساكن كل الافئده
***********************
من زقزقة عصفور على غصن الشجر
من لئلئه ندى من ميه مطر
من صمت السكون فى قلب الحجر
من ضحكه طفل برىء بين البشر
من قلب طفل ف المهاد
لقلب موجوع ف البعاد
بيحلم يعود من غربته
باعتين يقولو ياسميرنا مرحبا
******************
من شعاع الشمس لعيون القمر
غنوه امل تتغنى ف ليالى السمر
من هدير الميا ف قلب القنا
من جريد النخل وعرجون ف السباط
باعت اليك الفين تحيه وملونين سلامات
الفين تحيه يالى موجود وسطنا
*******************
من عيدان خضر وكيزان الدره
من حبات قمح ع العيدان ف السنبله
من حنين الارض الشراقى للروى
من عبير الزهر
من طرح الجناين
من صميم القلب
للحب الى دايم
من قدوس ف الساقيه بيلف بعزايم
من فرحه ام بطفلها وهو لسه قايم
من ليالى الدفا على فرن الحضير
بتهد فى برد الشتا على الحصير
من حلم ساكن قلبنا دايما كبير
بعتين يقولو مرحبابك وسطنا
اخ وامير
**********************
من جندى واقف ع المرابض
من كام سنة ع البندقيه وهو قابض
بيغنى نشيد العبور وهو غاضب
من مدرسه وطفل لساه ف الحضانه
من ابله من استاذ بيادو بمهاره
من فلاحينا السمر ف قلب الغيطان
من صهلله فرس ماهوش جبان
من مركبه ف النيل بتميل على الموجه بحنان
من كلمتين دافيين من قلب ست الدار
من شمس ناطره شعرها على ضى النهار
من اسطى ف مصنعه من اودام فرن نار
من كل واحد ف البلد دى
من عندكم لحد عندى
الف تحيه ياسمير
ومليونين سلامات