|
مرحوم ياللي سمعته ترفع الرأس![](clear.gif) |
نوماس علمه للنفوس العليله |
علمه ينومـس بالفخر طير قرناس![](clear.gif) |
حرً نهار الضيق كلن يجيله |
له موقفً مثل الفرح حزة الياس![](clear.gif) |
بالهقوه اللي كل بارق تخيله |
أبويه اللي للمواجيب نبراس![](clear.gif) |
له سمعةٍ ترفع مقام القبيله |
له الوفا والطيب مبدى ونوماس![](clear.gif) |
درب المراجل مايضـّيع دليله |
صادق مشاعر يحتوي قوة الباس![](clear.gif) |
ماعاش في دنياه لحظه ذليله |
خبر وفاته أودع الفكر منحاس![](clear.gif) |
وأنشل فكرً ماقوى نزف قيله |
يوم الفجيعه أعتلت ضيق الانفاس![](clear.gif) |
مالوم من عـّيت عظامه تشيله |
قالوا توفى وجاوبت هـزة الراس![](clear.gif) |
مع سقطة الدمعه وفوح المليله |
احساس صادق وأنجرف دون مقياس![](clear.gif) |
فيض الحنان اللي سكن بي رحيله |
في داخل أعماقه كما طفل حـّساس![](clear.gif) |
أستوطن أعماقي وصرت أنتمي له |
كتبت شعري دم بكفوف قرطاس![](clear.gif) |
دمعة يتيمه تذكره كل ليله |
رغم البطا ، رغم الزمن ، رغم الارماس![](clear.gif) |
باقي معي للحين صوره جميله |
ضميتها . حطيتها . بين الاقواس![](clear.gif) |
لاضاق منها الكون صدري يشيله |
صوره لها نبضي ودمعي والاحساس![](clear.gif) |
صورة شموخ وللمبادي فضيله |
جعل العوض بقلوب ماتعرف الياس![](clear.gif) |
تدعي له الرَحمن منجي دخيله |
تطلب له الرحمه من الله ولا باس![](clear.gif) |
أعـداد من لبا وصلى النفيله |
عد النجوم وعد ماهب نسناس![](clear.gif) |
عد الشجر وأعداد بارق مخيله |
في جاه منهو عالمٍ غيب الانفاس![](clear.gif) |
في جنة الفردوس يصبح مقيله |