سقط الجدار
وهوه بيندهك شاهد عليه
وهوه بيحرسك جواه شهيد
كل اما دبت روح جديده ف الورق
كل اما نبت الخوف مرق
كل اما عاد الود فى جوف الولد
ومسك بايده رمال بلاده
يضمها لحضنه
يشرب حنينها
يتولد
سقط الجدار
لما انحنى الليل للنهار
والصمت غادر مسكنه
وحلف يترجم كلمته بكل اللغات
لما انجلى الغيم م السما
وصبح شعاع الشمس حر من العمى
ولقى الحبيبه الملهمه
سقط الجدار
اللى انبني بجماجم الامل البرئ
وبنفس قوه مدفعه
اصبح لا شئ
وظهر سراب الحلم
فى وضح النهار
سقط الجدار