قصيدة [ عـيـد ] شعر / نبيل مصيلحي
***
دايماً بتيجي ..
واحنا ليك مستنيين
رغم إن عيون زمانك..
واسعه جداً .. فيها غيرنا..!!
واحنا في خيام العتامه يروي أحلامنا الأنين
إيه يا عيد ..
فين شروق البسمه في وش العيال
جاي ليه من غير هدايا الابتسام
فين حمام القلب لابيض فوق بساتين الحياه
فين يا عيد..
حبات نداك الفضه.. تغسل بالرضا قلب الصباح
جاي صامم ليه ودانك .. عن رصاص الغدر في صدر النهار
عن صراخ الطفل في حضن البوار
عن هروب الطيره من أرض السلام
جاي قافل ليه عيونك .. عن جراح بتنز أعمار المدن
والآهات تغزل تضفَّر بالوجع شعر الليالي
والدموع دايره تمرر بالسهاد جفن الثواني
إيه يا عيد ..
وانت جاي ابقى افتكرنا
إحنا مش عايزين يا عيد غير الحياه
في الشوارع والبيوت .. جوه القلوب
والحمام يرجع يطوف فوق سطوح الحُب..
يُلقط حَب من غيط الوطن
يفرد إيديه شجر الزتون
ويمد نوره في شبابيك الزمن
لملم الأرواح يا عيد
إللي أهدت للوطن شمس الخلود
إللي نسجت م القمر توب الوجود
إللي لسه شذاها بيعطر زمانا بالحياه
لملم الأرواح يا عيد .. جوه روحك في السما ..
قناديل تنَّور للعيال
يجروا .. يملوا الدنيا ظيطه.. يشربوا م النور ضياه
******