يا رب انت اللي عالِم بالعباد يا رب
وعبدك لما يرفع إيدُه بالدعوه
بيرفعها بْعشم وبحُب
وفيض كرمك ما يكسفهوش
ولا يردّوش.. كده فاضي
بتسمع منه وتلبّيه
ويصبح في حماك راضي
ومين غيرك
هيشفي الأم لولادها اللي لجأولَك؟
وقالولَك
يا شافي اشفي اللي ربّيتنا
وفرشت بالحنان بيتنا
وسهرت لجل راحتنا
وخلتنا
صحيح رجالة ملو العين
ونتمنى نردّ الدين
لستّ الكل
وترجع شمسها تاني علينا تطُل
ونقعد تحت رجليها
نبوس حَبّ التراب وننام على إيديها
فيا شافي العباد اشفيها واحميها
ما هو انت الشافي..
مين غيرك هيكشف عن قلوبنا الهم؟
وهيه أُمّنا.. رُوحنا...
ومين غيرها..
هتبقى بَعدها لينا أُمّ؟
اللهم اشفِ أمّ أخينا الدكتور فوزي شفاءً عاجلاً
قولوا آمين