لما كرامة مصر اتهزت
أصبح فيا الفاشل بيه
والي اتعلم واللي اتبهدل
لف العالم مد اديه
أمال ايه
أصل الدنيا بتدي كتير
بس بتاخد طبعا أكتر
واللي هيسرق واللي هينصب
هوالأشطر
أمال ايه
أصل كرامة مصر عزيزة
واللي باعوها ادونا بريزة
شالو النسر وحطو القلعة
والشلنات بتروح في الزور
شالو كمان أهرام الجيزة
حطوا القلة وصارت ميزة
واما صاحبنا الربع جنيه
قصة غريبة ومن غير ليه
ربع جنيه مخروم ومدور
عارفين ليه
علشان يبقى حجاب فـ ميدالية
يجري وراه الألف جنيه
ممكن يبقى بداية ثروة
أمال ايه
ربع جنيه
ممكن يجي يقولك مرة
جمع أربع تربع وابعت
يمكن تكسب نص جنيه
*****
كان الربع جنيه له قيمته
كان النسر بيرفع هيبته
واما الوقت الحال اتشقلب
والمصروف بقى نص جنيه
والشحات لو مادد إيده
قبل ماياخد خمسة جنيه
ممكن يدعي عليك ويسبك
هو جنيهكوا هيعمل إيه
كل العالم راكب فوقنا
واحنا فرحنا
ان كرامة مصر بلدنا
صارت سلعة بربع جنيه
والأخبار بتقول في العالم
ان النسر القومي بتاعنا
حطوا مكانه الربع جنيه