(( مشهد من حفلة خروج على المعاش )) للشاعر / محجوب الجارحي

مشهد من حفلة خروج على المعاش
للشاعر الأستاذ : محجوب الجارحي

خارج معاش
يا خلق هوه ...
ما بحبهاش الكلمة دي
ما بحبهاش ...
...
يعني إيه كلمة معاش
دا انت بالذات اللي عاش
دا انت غربلت الليالي
دا انت هننت الأماني
وإبتسمت لحلم لسه
ما إبتداش ...
...
وفرشت عمرك عـ الطريق
الكل عَدى ما همناش
وياك فهمنا المسألة
وازاي نهد المشكلة
ما تهدناش ...
...
ما بحبهاش الكلمة دي
ما بحبهاش ...
...
يعني إيه كلمة معاش
دا انت بالذات اللي عاش
ياما طمنت اللي خايف
إمتى ضاع الحق قدامك بلاش ...
...
وزرعت قلبك عـ الحدود
وحصدت لقمة ما كلتهاش
ووقفت قدام الديابة
وحرمتهم دم الغلابة
المطحونين بالإنفتاح
والإنكماش ...
ما بحبهاش الكلمة دي ما بحبهاش ...
...
يا خلق هوه .. إيه المعاش
أنا لسه دوري ما إنتهاش
يعني أعِد كراسي بيتي
وَلا أدخَل كل أفكاري
الجراش ...
...
يا خلق هوه .. إيه المعاش
أنا ضي روحي ما إنطفاش
لسه فى الأنفاس أجل
لسه فيه عزم و أمل
لسه ف ـ القلب إنتفاضة
وانتعاش ...
...
خدتوا أحلى عمري قِسط
ليه بترموا الباقي كاش ..
ما بحبهاش الكلمة دي
ما بحبهاش ....
....

الأستاذ محجوب الجارحي
المحامي
عضو رابطة الواحة / فرع مصر

نعم الشاعر
أستاذ محجوب الجارحى محدش يقدر ينسى كلماته
أشكرك أستاذى الفاضل شاهين لنقلك إلينا تلك القصيدة الجميلة
وطلب شخصى بعد إذنك لو حضرتك عندك معلومات عن شاعرنا
الأستاذ محجوب ياريت تفيدنى بيها
لأنه مختفى بقاله فترة ومش عارف أى معلومات عنه
يا ريت تطمنى ,, ولو فى وسيلة إتصال بيه ياريت تفيدنى بيها بردو
مع خالص الحب والمودة