مانيش مارد ولاعصفور
يموت الحلم جوايا ميتين مرة
مابين طلعة قمر غايب
بقاله زمان
وبين لمحة نهار مشنوق
ياخدني الشوق
علي باب الرجا .أحلم
وحلم جديد
بياخدني وهمي من نفسي
أبان عصفور
بيعشق زقزقة عشه
وضحكة مزوقة وشه
وحر يعيش
بيعلا لفوق
لفوق يعلا
لكنه حزين
ومتعشم بيوم يفرح
مايعرفشي يكون ظالم
ولايعرف ف يوم يجرح
فمات مهموم
مانيش مارد ولاعصفور
ماليش جناحين
لكين طاير بحلم جميل
أكون موال ف وسط كلام
أنا راضي
أكون انسان
أنا راضي
مانيش مارد
ولاعصفور