[ رمضان كريم
رمضان كريم يا شعرا
وانتم طيبين
إيه رأيكم لو قلنا
حبة كلام حلوين
****
ننقع حروف القصايد
خشاف للصايمين
مدام غلوا الياميش
بشر وزبيب وتين
حتي الهوا والميَّه
والعيش وقمر الدين
*****
يبقي فطارنا كلام
دعا ابتهال تايبين
أما السحور تهجُدْ
حبة بكا نادمين
نغسل قلوبنا القاسية
يمكن نفوسنا العاصية
ف غفلة أو قول ناسية
عملت ذنوب وخطايا
من آلاف السنين
إيه رأيكم يا شعرا
نصوم ونفطر سوا
ولا انتم مش ناويين ؟
*****
اللي ناوي معانا
من أول لشهر الكريم
يطلب من مولانا
يهدينا والسامعين
يرفع إيديه للسما
ويدعي كعانا ربنا
أو يقول ورانا آمـين
[/frame][/frame]