أمارس حقي الشرعي
توى خرجت من الحمام
الفوطه في أيدي
وشعري بينقط فوق السجاده
لاقيتك قدامي عينك حمرا
وعشرين عفريت بيطنططوا قدامك
ازاي سايب شعرك بينقط فوق السجاده
وهدومك في الأركان مرميه
وصحون الكون منطوره في كل مكان
أزاي سبت لنفسك طيشها
تتشاقي وتطلع فوق الحيطه
وتخربش كل ستاير بيتي
وأزاي سايب كل الشبابيك مفتوحه
وسمحت لنور الشمس كمان يدخل
ويعشش فوق الكنبايه
أنت أكيد أتجنيت
دول هما عشر تيام
سايباك وموصياك علي كل صغيره وكبيره
أزاي ....أزاي
وأنا لسه واقف قدام باب الحمام
والفوطه في أيدي والميه لسه بتنقط
واقف مذهول .. فرحان
وأنا شايف سجان البيت غضبان
مش عارفه تكمل
وأنا باتلفت في سعاده
وغرقان في بساطة يومي
حاسس أني اتنفست أخيرا
وقلعت الجزمه في سريري
زي ما حلمت زمان
وطلعت من جوه هدومي
وخرجت بالفوطه من الحمام
أكل مغسلش صحوني
وأعيش يومي بجنوني
من غيرأمر السجان
وأمارس حقي الشرعي
في أني اكون انسان
اشرف نبوي
6-2008