الحياه معناها إيه؟
لو يغيب الاشتياق
لو يغيب الحب منها
تبقى مليانه استياء
لو نعيش اليوم بدونه
يبقى هنعيشه بنفاق
الحياه من غيره تُربه
الحياه يعني اشتياق
.....................
اشتياق .. لماضي فات
اشتياق للذكريات
اشتياق لحلم كنت
رسمته مرَّه لكنّه مات
اشتياق حتى لجراحك
أو لصوت وجع الأهات
........................
الحياه لو مش بشوق
هنعيشها ليه ؟
هيا يعني الدنيا كانت
تسوى إيه؟
غير يدوب حبة حنين
ولاّّّ ضحكه ودمعتين
ضحكه لما القلب مرّه
يشوف حبيبه
ودمعه لما فلحظه يبعد
أو يسيبه
ودمعه لما القلب يصرخ
من نحيبه
نفسه بس ف نظرتين
.........................
الحياه يعني اشتياق
إشتياق لكلمه حلوه
أو لنبض الشوق ف غنوه
أو لذكرى غايبه عنك
من سنين
........................
اشتياق لصديق مسافر
أو حبيب غايب مهاجر
أو مكان نفسك تزوره
لثانيتين
.......................
عرفت إيه الاشتياق
يعني جزء من الوفاء
يعني فِ نهاية كلامي
جوه قلب الحر فينا
أحلى داء
هوَ دَ الإشتياق
الشاعر / أحمد سعيد موسى
إهداء إلى الحبيب الغالي .. الشاعر القدير " محمد عبد القادر"
تحياتي للجميع