-1-
(بعد حباية شجاعة)
كلمتين ..
اللى يتحدانى يخْسَر..
الوشوش اللى احتضنت ف كبريائها
بنظرة مليانة احتمال ..
مش هلوِّن فيها إحساسى افتعال ..
و الدلال ؟
حس دابل فى اللى يستاهل ألِفّ
لسورُه ضهرى
بعد ما اتهَدِّم علِيه .
و القِناعات المريضة شَقَّها من عينى
برق من احتقارى
للى تتسَتَّر عليه
لو هيعمل حد منكم نُص فاهم ،
هزة الكتف اما تستغرب له هيعاند ف فهمه
بدون ما يدرى العند هيكمم عينيه !!
-2-
(بعد حباية نفاق)
من زمان حاسس بإن الكلمة بينّا
قرَيِّبَة ، يخطفها من يسبق
و يعمل تاج شرف .. ويحطه للتانى!!
الأكيد ، سكِّتنا واحدة
حتى رغم ان الخطاوى عكس بعض !
حتى رغم ان اللى جُوَّا ف قلبنا
للبعض منا عَدْل بُعد ..
بس لسة
يمكن المشى اتجاه البحر لو فَرَّق خطاوينا
ف قرون الدِّلْتا يعْكِس خط سيرنا
و نمشى عكس البحر يتلَمّ انفراج الزاوية
نتقابل ، وتتقابل مصالحنا و مصالح
من يحاول بَعدنا !
-3-
(بعد حبّاية مروءة)
كنت فايت ..
شُفت قلب الطيف بينزف
قلت كان محتاج لأخبارى الأكيدة ..
عن وجود الضى من فتحة فـ شواشى
مش بعيدة
رَدّ فيَّا النوح و سَهَّانى و رَمَى
للمَنْفَذ المسموح حَجَر
و لكَسْرة الموال حَجَر
فين الحذر ؟
راح و فاتنى !
لما ساويت اللى شاور للنجاة الـ "ممكنة " ..
بين الحروف وقت الغُنا ، بكلمة "أنا"
-4-
(بعد حباية نَدَم)
كلمة منهم
كلمة منى
و الكلام الـ"حر" رأى ..،
بس أكتر شىء بقول عنه اعترافى بكل صوت..
إنى لما سمعت أول "دلو" ما اختارتش
من البدء السكوت ..
-5-
(بعد حباية صراحة)
المُراد م القلب واصل للسان ،
واضحة النفوس .
زى تحليل الأشعة ، لما يفْرِج
عن مرض محبوس ف رؤية ضيقة للنور
ظَبَطْتُه بنظرتك من فوق لتحت وقلت
آه منها الأماكن
لو نغيب عنها فتطلع من جحور الحى
أسراب الدَّنَس ..!
-6-
(بعد حَبّايْة انتباه)
أنا إمتى أصلاً جيت هنا ؟
27/10/2008