هادّيلك ..
فرصة تانية للمشاهدة
بس المرّادي
عاوزك تركِّز قوي
ف كل التفاصيل اللي ممكن ..
تخليك مرتاح
جرّب .. تبُص برؤية تانية
وتشوف الفستان .. كإنه السما
بتزغرط .. علشان هتمطر ف حضنك
وتبلّك بحاجات محتاجها
وتحس الشَعر كإنه الليل
بيغطي تفاصيل الرغبة
الباينة ف وشك طول اليوم
استعمل ايدها مخدة
وطولها المُفرح جداً
كإنه الضل
اللي بيحميك من لمبه
كانت هتبيّن قلقك
هتنام فرحان ..
كل التفاصيل ف اللحظادي مغايرة
جرّب .. تفتح جوه عيونها
شبابيك الأحلام على قلبك
إحلم ان الحب
البحر الشايل حلم سفينة نوح
الضل / الشجراية / الساقية
وفارده عليها كل خضار لدار
ألقُط ولاتحزنشِ
الليلة كل التفاصيل قدامك
ماتشوفهاش من ع السطح
يمكن تلمح
شكل تاني للحياة