كنت يا دكتور قد حسدتني في مرورك الكريم في صفحة الترحيب على زبايني ... فذكرتني بموقف ما زال عالقاً في الذاكرة من سنين وأريد أن أفش خلقي بذكره ولكن لا أعرف من مين :
هادا مرة يا سيدي طالع بالبولمان من دمشق إلى حماة وصدف انو كان بجانبي سيدة كبير بالسن وأنا كنت نسبيا بعدني شاب ( مع انو رفقاتي بيقولو ما بنتخيل انو انت كنت شاب يوماً) وكعادة أغلب الكبار بيحبو يحكو كتير وكنت أنا من مزايا طبعي بحب سايرهم وبسمع كويس ... حتى لقبني أحدهم باحد الأيام أبو العجايز ... المهم العجوز شعرت بالأنس لسماعي لها والانفعال مع أحاديثها وكان أغلب الحديث متركز على ابن ابنها هذا الحفيد المهندس الزراعي اللي على حسب حديثها خارب الدنيا بيفهم بكل شي ومشاريعو ضاربة بالآفاق وانا دوري كان مقتصر على المسايرة والموافقة ... وبالنهاية وقرب موعد الوصول طلع يا سيدي حفيدها المهندس دارس ثانوية زراعية وسألتني يا ابني انت مودارس قلتلها دارس قالتلي شو درست ... فلم أكد أقول لها طب بيطري حتى تنهدت بكل أسى والم وقالت : له له له والله ما بتستاهل انت كتير مرتب ... وقبل ما رد أو حاول أكملت : بس يا ابني اياك انو تزعل او تخجل يا ابني الشغل موعيب !!!!!!!!!!!!!!!!!!!!!!!!!
مين المذنب ما بعرف هو الجهل في مجتمعنا ولا أنا لأني ما جبت معدل يدخلني فرع غيرو ولا والدي رحمه الله اللي ضغط علي لأترك الهندسة وسجل بالطب البيطري ... المهم مو مشكلة .. يالله .... الشغل موعيب