أنا إرهابي.. أنا إرهابي
وِاسأل حتى كمان اصحابي
وانت تلاقي دمار العالم
صفحة يَدُوبك جوه كتابي
أنا إرهابي.. أنا إرهابي
في طفولتي وْمن يوم موعود
كنت ارضع بنزين وبارود
وكيماوي وكل الموجود
وشظايا تسَلّك أنيابي
أنا إرهابي.. أنا إرهابي
من صغري ف كل الأجازات
بلعب بقنابل وغازات
والمولوتوف مشروب في كاسات
وبَشَرّب طبعًا أحبابي
أنا إرهابي.. أنا إرهابي
عندي جيراني أكيد شاهدين
شافوا جرايمي سنين وسنين
ما افتكروش غير يوم تلاتين
إني بفَجّرهم في غيابي
أنا إرهابي.. أنا إرهابي
تلاتين سنة مع بعض تمام
ولا فيه شكوى ولا إلزام
وانتخبوني بنسبة كام؟
بس ف لحظة اهو باعوا جنابي
أنا إرهابي.. أنا إرهابي