مش كتير في الدنيا زيك .. مش كتير
يفتحوا قلبي في لحظة
أو يخلوا روحي ليهم زي طير
مش كتير بيحسوا بيا وينادوني بدون كلام
ألمس النبض ف قلوبهم
أنسى حزني والآلام
والقى نفسي في مرايتهم نسمة دايبة في العبير
مش كتير في الدنيا زيك مخلوقين من نور وبس
كلمة منهم بتداويني برقة مخلوطة بهمس
لو عليا
نفسي أجبلك نجمة تسهر ليكي وحدك
أو يا غالية
فوق سحاب الدنيا أبنيلك مدينة
وبين ايديكي ليها آخدك
فوق حصان أو شال حرير !
مش كتير لو قلت عنك : ( هي آية ف الجمال )
أو وصفت الحب منك .. غنوة دايبة في الدلال
أصلك انتي
معنى فيه الكون أسير
مش كتير لو سيبت قلبي بين ايديكي
أو حتى سبته يكون فدا لرموش عنيكي
أصل كل الحب فيا
-ليكي انتي-
مش كتير
*********