يا ليل البعد يا مفرق ما بين حبيبين
بقالي شهور بقولهالك "نهارك فين"
أخدت حبيبتي من حضني ولا حنيت
لنار فيا ما يطفيها شهور وسنين
دي كانت أما تحضني بشوف الكون
كما جنة ملاها الحب مـ الجنبين
وف عيونها اللي وحشاني
بقابل نبع وجداني
وأشرب منه حرماني
لدمع العين
دموع من نشوة الفرحة
بتنزل تغزل الفرحة
على الخدين
يا ليل البعد فهمني نهارك فين
بقاسي ف بعدها عني لهيب البين
د كل جوارحي سيباني وهيمانة
ف أحلامنا
ف أيامنا
ف صوت البحر قدمنا
سلام ايدها اللـ مش عاوز يسبني حزين
وأما بإيدها تضربني
وأما تقولي جنني
وأما تقول: " يا نبض القلب ،
حبيبي انتَ ،
بحبك من عميق روحي،
وحبك لي في الدنيا ليوم الدين "
يا ليل البعد يا ما فرق ما بين حبيبين
حقيقي بجد مش قادر أشوفنا اتنين!