إيه المفيد ؟؟؟؟
بقلم : أحمد عطا
............
إيه المفيد ؟
فـِ انك تعيد ، وانك تزيد
ومفيش جديد
إيييه المفييييد ؟؟؟؟
فـِ انك تشاور عَ الهرم
وتقول دا بإدينا اتبنا
من ستَّـلاااف مليون سنه
يادى الفَـرَح ، يادى الهنـــا
لكن أنا
باسأل جنابك شيء محدد .
شيء وحيييد
إيه المفيييييد ؟؟؟
.
لمَّـا تقول إن الفراعنة أصلنا
خفرع وخوفو ومن قرع
همَّـا اللى منهم نسلنا
وحضارة عايشه بتهدى للعالم علوم
طب فِــز قوم
ورِّينى كام مصنع بنيتُه يا عَم بُـؤ
وتفيد بإيه كل الحضارة
وناس كتير مش لاقيه حُــؤ
مالك ومال المعجزات ؟؟؟؟
خفرع ...... ومات
وحجارتة عايشة تعجِّــزَك
بِتذِل فيييك
ثابته فـ مكانها ، والطبيعى الدور عليك
إنك تخطى مجدهـا
بس الأكيد
إن احنا عايشين ضدنا
لو إيد بنيتنا ، ألف إيد بتهدنا
وتصدنا
تقتل طموحنا وتحيِى فينا عَـجزِنــا
والخير رافضنا نكون معاه
.
وان مره فوقنا وقولنا لأ
نفضل بقيِّـت عُمرنا
بالغصب عن عين أٌمنا
ندعم بـ آه
نصرخ بـ آآه
نندب بآآآآآآه روح الشهيد
ومفيش جديد
طب إيه المفيد ؟؟؟؟؟؟ .
.................