ما نيش فى المود ... ومش لاقى كلام يتقال
وكيف أقدر .. وأنا مقضى حياتى هروب
من الأرض اللى عماله بتطرح ناس
من الناس اللى ما هم ناس
وشارع كان بيحضنى بنسمه صافيه من بسمة صبيه بكر
صبح يعصرنى يشرب دمعتى يسكر
ويتطوح
فتتسقط من الشبابيك .. سنين غربه
من الغربه اللى طارحه فى القلوب توهه
من التوهه اللى طارحه فى العيون دمعه
من الدمعه اللى نازله تروى بور الحرف
فما تطرحش غير الآآآآه
من الآهه اللى راشقه فى السما سنانها
وبتمص بشراهه دم فجر يدوب فى مهده طفل
من الطفل اللى راضع قهر من أمه
.. ومفطوم ع الهوان والشيب
من الشيب اللى طارح فى العيون عتمه
من العتمه اللى طالقه فى السما غربان ..
.. تطارد أى كلمة حق
تطارنى
فاقضّى عمرى كله هروب
وأعيد الكره م الأول
وأحكى عنى لما أكون ما نيش فى المود
ومش لاقى كلام يتقال
(((( اسلام محروس ))))