معنى الوجع
نقطة عرق
مع نقطه دم إتسرسبت
من بين صوابعى على الورق
عملت علامه ..
دايره وسعت م القلق
نزلت وشفت ألف صفحه
وألف يوم من غير شفق
نقطة عرق
رسمت إمام الأبجديه اللى إنحرق
من حرقة الدمعه الدفينه
واللى شقت بيها
تحت العين نفق
نقطة عرق
لافت على دمعى الممرر
واللى عدى على الغرق
سالت ونزلت من جبينى
لتحت عينى لحد حلقى ما شرق
فلقيتنى بصرخ غصب عنى
وغصب عنى ساعتها نزلت
من عيونى نقطه دم
كملت معنى الوجع