دمعة أساك
يا بِنية صبت في القليب
عبت مسام الروح شجن
إتلون الضلع القصار واتكسرن
أما العيون نسن الفرح
ليلن نهارن يذرفن
حلفن يمين من فتحن
ما عانقن بالمرة غير لون الحزٌن
نط الحَلِق
معبور محَنضَل مختنِق
قال العيون ما ليها حق
ليه يشتكن ؟
إيه الجديد
العلقم الحُر المعتَّق
في حشاي طاب لي المقام
والعَبرة من صرخة ولادتي محكرة
خانقاني مانعاني الكلام
لا يوم شكيت
لا مرة عز الليل بكيت
والله العيون ما ليها حق
ما بصبرن ؟
يا بِنية يا ضي القبيلة
يا راحة الروح الكليلة
دمعة أساك
طاعناني في ضهر الأماني المستحيلة
شالاني ما خالالي حيـلة
بتذكرك
ومتين نسيتك عشان أقول بتذكرك
بطراك في التِلِت الأخير
ساعة تطيب النجوى تنطلق السهام
ساعة تفيض الدمعة و يرق الكلام
واطراك في عز الهجير
عند الطواف وسط الزحام
ما بين زمزم والمقام
بتمنى ليكي دوام هَنَاك
كان أملي أفرش ليك دروبك بالغرام
وأكون سياجك في عُلاك
أرويكي من عطر الكلام
إشراق صباحك وفي مساك
وأقاسمك الزين والعديل
وأوسدك راحة ضميرك وانتشاك
لكني وا حرقـة حشاي
ميعادنا كان دمعة أساك