طلع النهار

طلع النهار شق السحاب
وبلدنا شقشق فجرها زاح التراب
عصفور وطاير في السما
عمال يسبح ربنا
وشيخ جليل قاعد بيقرا في الكتاب
وايات عظيمة تقولنا
انتظروا رحمة ربنا قبل العذاب
وابو اسماعيل
خارج وراكب بغلته
لابس هدومه وعمته
رايح يراعي زرعته
وف صرة لافف غدوته وبيشكر الوهاب
وام اسماعيل
قاعدة بتحمي ف فرنها
وجارتها قاعدة جنبها
والقش جنب الباب
تدعيله ربي يرزقه من اوسع الابواب
والواد حسين
خارج ولابس مريله
جميلة مش متهرولة
مشروع مهندس او طبيب
وكل واحد في البلد
يعمله الف حساب
مصر جميلة بأهلها الشاقينين
المطحونين
اللي بقسمة ربنا وحكمته راضيين
لكن في وقت الجد
يملولك الميادين
يقولو لأ للظلم ويدوسوا ع الخاينين
يكسًروا القضبان ويفتحوا الزنازين
ويكونو فوق في السما من غير جناح طايرين
مصر جميلة بأهلها وبلمة الاحباب
وبحلم ديما يبتدي بركتين وكتاب
وابو اسماعيل خارج ولابس عمته
وعصفورين نازلين غنا فوق زرعته
وام اسماعيل قاعدة بتخبز لقمته
وجارتها قاعدة جنبها
والفرن جنب الباب

جميل انهمارك شاعرنا الفاضل وصورة رائعة نقلتها لنا بحرف ماتع
مرحبا بك في واحتك
وعلى صفحات الآخرين
تحاياي

تحيه عطره لحرفك الراقى ولملحمتك البديعه
كلمات راقيه معبره
دام الابداع
وبالتوفيق

صورة مصرية صميمة
أبدعت رسمها وبدقة
شكرا لك أستاذ / حسن

تحيتي

حمادة الشاعر
أديب ، وشاعر

جزاكم الله خيرا على مروركم الكريم وكلامكم الاجمل