النور خلاص

النور خلاص ؟
وللا خلاص النور ظلام ؟
الورد دبلان ف الربيع
والشوك كتر / مالى الغطان
الشمس /
جيا تحرق ضهرنا ؟
وللّا بسلام ؟
كنت بحلم بالأمان / وبالحياه
ولسه بحلم زي زمان
..................................
............................

لساكى بردو بتبعدى
والبعد بنا مش سفر
لساكى فيا بتظلمى
وانا ألأمان وقت الخطر
وانا حبى ليكى مش نفاق
وجرحى علشانك علاج
ونفسى اشوفك ف المطر
أو حتى أشوف ضى القمر
ليه كل ما كتب لك يمين
تكتبينى شمال ؟
فكره المعاد ؟
ألفين معاد
ولسه بردو بتعندى
وبردو سكنه ف الفؤاد
هو انتى عشقه شهر يار ؟
وكل كلمة حق
تلاقى ميت سياف
قاتل الصبايا يكون بطل .. ازاى ؟
هو اللي رايح جاي ؟
وللّا اللي جي عجاف ؟
بنت الجيران
لساها وقفه بتنتظر والقطر فات
كل الشجر أصبح خريف
ليه بتتقتلى حلم البنات ؟
هما السبب ولا الظروف؟
ولا البطوله نعيش ف خوف ؟
لسانا بردو بننتظر
حبة سماد
حبة مطر زى النبات
الجذمه دابت / والبنطلون
علشان اجيب لى رغيف
والقضيه / مش رغيف
دوقت الوجع والمُر
لكنى عشت نضيف
رافض أكون صوره
أو كِمالت عدد
أو أرضا بالتزيف
انا كنت ادارى الخوف وابكى لوحدي
علشان بحبك قوى
وقفت ضد الموج
ورقبتى تحت السيف
هى السما بتنزل ؟
ولا احنا راح نطلع ؟
علشان مانعلى قوى
لازم ف يوم ندفع
قولي لي إيه التمن
مدفعتهوش
الجوع
البرد
الضرب
وللّا سنين المعتقل
الظلم خد مني االسنين
واللي قال لك مانتيش حبيبتى
حبيبتى ماتت
وحبُى ليكى كان نفاق /بتكرميه !!
قولى لى ليه بتكرميه
وانا مش فلان
ومش بمثل ف الكلام
أنا اللي قولت لك زمان
ياحببتى /
بكره هتفوت السنين
ويموت قبيل ويعيش هبيل
وهيبدء الحلم الجميل
بين شوارع فاضيه خالص
وزحمة السلطان حسين
وهتنزلى ف مدان عرابى
وهتنزلى وسط الحسين
وكل خوفى تسئلى نفس السؤال
هو أنت مين ؟
وانا اللي نازل / للسما
وانا اللي طالع / تحت
انا اللى ميت بالحيا
ولما موت ارتحت
انا الفقير بالغنا
وانا الغنى بالفقر
انا اللي حربونى
وزقونى
ولحظة سقوطى نجحت
أنا اللي علشانك بكيت
وانا اللي علشانك بنيت
ولقتنى جوه الفحت
خدتى كل فرح مني
وكنت علشانك بغنى
والجرح فيا لقيت
انا شارع الاسعاف
والحاره والكرنيش
انا زرعة عمى نبيل
وصنعة الليل الطويل
انا التراب والجيش
انا كنت مدفع ف الحروب
وكل مدفع انجرح
وكل ماصرخ م الألم
أنا كنت بكتب لك فرح
فازاي / أندهك ماتجيشش
انا كنت نازل بالجاكت والاربجيه
انا كنت جيشك
مش كنت برقص لك بليه
انا دمى سال
غرّق / خط برليف والقناه
انا كنت ببكى
وكنت بضحك للحياه
انا اللي بنده لك تجينى
وكنتى برده بتبعدى
وكنت بزرع لك حنينى / تحصدية
وتسبينى ف ألف آه
انا الزارع / وانا المزروع
انا اللي بديكي / وبفديكى
فازاى أكون ممنوع ؟
وانا قولتهالك بالغنى
وبالهدوء
وبكل معنى الحب
وبالخناق
وبردو لسه بندهك
وكل خوفى تغرقي ف بحر النفاق
أو تكونى كربلاء
سمعه صوتى ؟
طب سكوتى ؟
ولا بتحبى الزعاق ؟
شايفه جرحى ؟
دمعتى ؟
دمى ؟
صدقينى
جرحى علشانك علاج
طب نتفق ؟
بردو رفض الأتفاق
أ






أكرم حسن

قصيدة رائعة من شاعر كبير
----
ستزداد روعة القصيدة بتسجيلها صوتيا

خالص محبتي والتقدير

رائعة المعنى والمبني بصدق

مع تحيتي أ/ أكرم

تثبت القصيدة تقديرا للقصيدة المتكاملة والشاعر الشاعر

القصيدة رائعة بمعانيها وما حوته من قيم لكن ليتك قمت بتشكيل الكلمات أخي لكي نعيش معك موسيقى القصيدة ووزنها

دام ألق حروفك

مودّتي

لا للظلم وستعود الورود نضرة فوق الأغصان حتى وإن ملأتها الأشواك فنحن فداؤها
وستظل مصر كما قال شيخنا الجليل الشعراوي رحمه الله " إنهـــــــــــــــا مصــــــــــر وستظل مصر دائما رغم أنف كل حاقد أو حاسد أو مستغل أو مستَغلٍ
شكرا لك شاعرنا الرائع
تحاياي