أنا شاعر .. ودى بطاقتى

قالولى تعالى الانتخابات ..
وشارك فى اختيار الشعب
ضحكت وقلت شعبنا مات
وعمره ما ييجى غير بالضرب

لا فيه فلاح ولا عامل
ولا فيه صوت يقول الحق
ويرحم مصطفي كامل
ويرحم برضه قولة لأ

زمان قمنا مع الثوره
وقلنا عاش بطلنا جمال
أتارى الثوره كات فكره
وعايزه بس طولة بال

وتيجى منين .. خلاص راحت
على ايدين اللى عملوها
وبعد النصر أهى باظت
وضيعها اللى صنعوها

وقالوا ننتخب طيار
يطير بينا .. ويجري لفوق
فشد الحبل وحده وطار
وساب شعبه وراه مشنوق

أنا شاعر ومش قادر
أغنيلك مع الطبله
وأقول طيب وأقول حاضر
مع جماهير عاشت هبله
أنا شاعر ودى بطاقتى
وأصل الشعر فى الكلمه
وحعمل كل ما ف طاقتى
ولا يوم حمشي بالجزمه

وسجنك كله ما يكفي
عشان يحبس صدى صوتى
كفاية انت ومتخفي
بتقلق حتى فى سكوتى

مفيش مرة افتكرت الموت
ولا فكرت فى الآخره
حييجى اليوم ومش حيفوت
لأنه يوم ملوش بكره

وجرب مرة تسمعنا ..
دى كلمة حق يا صاحبي
وفكر مرة فى المعنى
دى كلمة وطالعة من قلبي

أنا نفسي فى رئيس فاهم ..
رئيس بيقدر المعروف
رئيس بيفوت وبيساهم
نقول عايزينه من غير خوف

اقف اكبارا واحتراما لشاعر قامة من اول عمل
ومرحبا بك معنا دوما
دمت بالق

يا أخى الكريم بارك الله فيك بتلك الشهادة التى شرفتنى
بالغ التقدير يا أستاذنا

الشاعر الرائع / محمد جاد الزغبي

لهو احنا في كمين
مصنوب يا عم ع السكة
حكمدارة بلك امين
بنسر وسيف وكم نجمة
****
ما تخفش يا أبوجاد
انت معانا في الواحة
لا محتاج هنا وسطه
ولا كرنيه ولا بطاقة
دا هما بتين ف قصيدة
تقولها لينا بالراحة
يملا عبيرهم قلوبنا
بشذي وردة فواحة

الأخ الكريم الشربينى خطاب
بارك الله فيك لتلك المعايشة وهذا التفاعل الصادق منك

ما تخفش يا أبوجاد
انت معانا في الواحة

أنا عمرى ما شفت الخوف
ولا عرفته ولو ثانيه
لأنى بالضمير معروف
وربك عارف النيه

أنا فى بيتى وبين أهلى
وريحة العز فواحه
وأخاف ازاى وأنا كلى
بنادى الحب فى الواحه