كتر خيرك
كتر خيرك
سكك الفقرا بتيجى حدانا وتوسع
عطشان يا بحر النيل
أنا جيى أشكيلك همى همى وهم ولادى واللى بيسمع
ليلاتي أشكيلك همي يا نيل
ها تسمع مني ولا مش فاضي للمواويل؟؟؟
أنا ما اعرفتش فوق الشط الشايل بدنى غير النوح !
واهو مستنى تبوت الموت الدور الجاى.
وانا قال واحد من ملايين ف أرض الطاهرة بتيجى وتروح
نعيش ونموت ولا حد بيسمع عشنا ازاى ومتنا ازاى!!
عطشان يا بحر النيل حزين مجروح
أنا فاكر أمى وابوى وجدى
فاكر فرحة خالى وخالتى ..أنا فاكر فرحة جتى
لما أبوى سمانى ممدوح
وفاكر بعد سنين وحكاية الحرب
علو الهمة وصوت الضرب
دفا الأحضان / عاشر رمضان ..رجوع الأرض بعون الرب
وكمممممممم وعود!
قال الخلق الصبر يا هوو ...واديها ليالي معدية وبكرة صباح
بنات بكفوف محنية شجر تفاح
ومهما الليل سهر نجمه ح ييجى صباح
وبكرة الأرض الطاهرة كنوزها تفوح
القمح سنابله تقوم والشمس تلوح
النخل الطارح طارح حلم غلابة كتير
وانت يا نيل قال مستنى ...؟؟؟
بتصبر عشقك بدرى تروح
زيك زيى تمام ,,,, احنا ولاد الشمس ..قمرتنا هناك
وقلت يا نيل واسمعنا لك واصبرنا معاك!!
وقلت يا خال إن ولادك دول شهدا بحق ...وضحوا لست الكل
باعوا ارواحهم خضراا لآاخر قطرة وفاتو الكل
ولما دماهم روت سينا حنت يدها وطرحت فل ..
قلنا خلاص ارفع راسك... ينصر دينك بلدك حر
وعاد فرحان وود عمى وجات الناس
والزغاريت المحبوسة سنيين فــ خشوم الناس.....بقت إحساس ...
بقت علام ...أقلام ..كراس
وسمعنا أدان
وقرينا الفاتحة يس والناس
نرقي بلدنا
من سلومها لغاية اسوان
صدقنا نفوسنا وقلنا خلاص
دا احنا حضارة بعمر الدنيا
دا احنا أساس
وقالوا خلاص ودعنا المر
وبقينا نعد سنين بتجر........... ح نرضا خلاص
أتاري أعمارالرضا بتعدي
ومحسوبة شقاوة ........محسوبة سنين من عمر الناس
كان جدي يقول :عد سنينك تلقى العد صداع في الراس....
وكتر خيرك
دا انت يا نيل مواويلك عزيق بالفاس
واحنا المر الطافح عاد شربينو بنرصو صفايح ما هو خلصان
دا احنا بقينا احوال مشهورة
كل عناوين الشقا مشهورة ف عيون الناس
وادي بلدنا بلاد النيل محصورة
هبة النيل الميه بتقطع فيها تلات ايام !!
الناس عطشانة ف ليل صيام
بق الميه بقاش موفور
حتى النور بقاش موفور
مهو معذور
في بلاد السد النور تقسيط
إيه ح ينور إنت عبيط
وإيه ح يشغل؟
عايزو ينور نجع البركة حواري المرج وكفر سرور؟؟؟
مهو معذور!!!
طيب قوللي الكام تكييف للبشوات منين ح تدور؟
ومنتاش خابر إن أكابر بلدك باعو الطاقة ...ومش بفلوس
وباعو الغاز ..
وصاحبك فاز.
موت محسور موت ميئوس
حجيبوا منين وهو مالو الجاز ف زمن النت
يا واكل ناسك مالوا الجاز؟؟؟ اقفل خشمك واسكت
دا حتى يقولو اللي بيفوت قديمو يتوه
ما نيش زعلان!
أهو بطلع غلبي ف المواويل
وانت يا نيل خليك بخلان
كبارنا يقولو إن النيل عليكو بخلان
وما لناش ذنب هو قلة حب يعني لا هي مؤامرة ولا سجان
كل القصة إن النيل كان فلتان عاشق بحري... وكان فرحان
ها بقي زعلان.... كشكش نفسه شوية ناحية قبلي ولم الدور
قلت يا نيل صح دا كلام
خليك جلعان علينا سنين .. مش أيام
واهو صابرين
خليك بخلان !!!
شوية قمح ومش عارفين
لا نروي قراط ولا فدان
خليك بخلان آدي الرز خلاص حرمان
يعني لا قمحة ولا رزاية ولا بستان
واحنا يا نيل صابرين
وكله تمام!!!
كتر خيرك
أشوفك بكرة
يللا سلام
ولد الجنوب ...... القاهرة أغسطس 2010
رد مع اقتباس
