يمكن ف يوم
تقدر تقدر موقفى
يمكن يبان م الظلم وجهه الخفى
يمكن تسافر للمدينة
وف المدينة
يمكن تشوف حاجات كتيرة
يمكن تشوف ف الشوارع
والحوارى
والبيوت
الف وش
والف معنى
والف صوت
يمكن تشوف الكلمة خانقها السكوت
يمكن شروق الشمس يخفيه عنكبوت
يمكن نعيش لالف عام ويمكن نموت
بس الحقيقة
ولو دقيقة
يمكن تبين انى كنت فيوم برىء
يمكن عشان نبض الحقيقة كان جرىء
خلا العيون
تغفل فيوم
يمكن ف يوم
*******
يمكن تسافر للقرى
وف القرى
تشوف جدار المندرة
متغندرة
ومتفرعنة
وشبابها هالة منورة
ع الجسرمدين قنطرة
يمكن على جدار الببان
مرسومة مدنه للادان
بتقول بصوت الحق
حى على الادان
قوم ياحق
ياحق بان
يمكن تشوف فى الغيطان
الحب مرسوم ع العيدان
الحب نايم فى امان
يمكن تلاقى ف حضنهم
فيه قلب دامع
يمكن يقولك ع الموجع
يمكن يدلك ع السواقى
وع الصوامع
يمكن هتسمع صوت انينى وهو طالع
ساعتها تلقى ضى نورى
مشعل وايد ف كل جامع
********
يمكن تسافر للفضا
يمكن تسافر للنجوم
يمكن تلاقى فى السما
الف غيمة
والف غول
يمكن يدق الطبل
تتهز الدقون
يمكن تلاقى الحزن سافر فى الغيوم
يمكن تلاقى الحزن ساكن ف الصدور
يمكن ف ليلة
يمكن ف يوم
الشمس تطلع ف السما
تشق الغيوم
والحق يظهر للعيون
والفرح يسكن ع الجفون
تلاقينى ضحكة عدت ع الشفايف
ترسم بفرحة
الف فرحة بالف لون
تلاقينى فرحة مزهزهة
ف كل العيون
يمكن ف يوم
**********