استفتاء
سيد الموجى
استفتاء ، استفتاء ، استفتاء
لعبة لا فيها ضمير ولا منطق ولا أخلاق
وان كان فعلا صف التسعات المعهود
مش موجود لكن مامنعش وجود الداء !
****
صِحِى م النوم عمك حسب الله وقال فيه إيه ؟
قالوا الدستور عايزين ياخدوا رأيك فيه
قال " دستور يا اسيادى " وفرفر ، أُغمى عليه
كانت صدمة كبيرة وداخوا لحد ما فاق !
****
قول هيلا بيلا شالوه ولحد اللجنة خدوه
كتبوا علامة صح اياها ولا سألوه
يعنى خلاصة اللعبة بحالها يا خلق يا هوه
عُطْل مصالح وانتقالات وجبل أوراق !
****
عمك حسب الله الغلبان روّح ع البيت
نجفة مراته قالت له : اتأخرت اتخضيت
عايزين عدس من الجمعية ورز وزيت
قال لها بكره العيشة يا نجفة هاتبقى عراق !
****
فقعت كام زغرودة لزوم هَبَل الستات
ع السعودية نويت يا حسب والا الإمارات ؟
بركة يا اخويا ان احنا هانلعب بالدولارات
بعد ما كان بياخدنا الفقر لحيث يشاء !
****
قال سعودية إيه يا " نجفجف " فوقى امّال
دا احنا خلاص ودّعنا الفقر ووَقْف الحال
كلها فركة كعب ونستَقْدم عمّال
من تايلاند وبنجلاديش والواء الواء !
****
قالت مالك ياسى حسب الله الشر بعيد
قال لها أبدا ، مخى تمام والصحة حديد
بعد صيام رمضان مش برضه بييجى العيد؟
والعيد جانا يا نجفة خلاص والبال اهو راق !
****
سمعت نجفة كلام جوزها رقعت بالصوت
ما هو ضَيَعان العقل مصيبة تفوق الموت
الراجل كان ملْو هدومه وبقى هلفوت
قال لها عيب يا وليّه بلاش تخريف وغباء !
****
نجفة قالت له يا " حسبو" يا اخويا انا خايفة عليك
وهاقوم حالا اولّع كف بخور وارقيك
والا ان كنت بعافية يا اخويا فى داهية الديك
هادبحهولك زى ما قال قرنى الحلاق !
****
هزّ دماغه وبص لها بكل اشمئزاز
قرنى وديك وكلام فارغ زى الألغاز
احنا خلاص مابقاش يلزمنا بلاد الجاز
حد قدر منهم يعمل مترو الأنفاق ؟!
****
الاستفتاء يا " نجف " هيحقق الاستقرار
زى ما قالوا ، وبكره يزوّد الاستثمار
تعرفى إنى حقيقى يا نجفة كنت حمار
بس بقيت شىء نادر بين كل الأشياء!
****
ماقتنعتش الحُرْمة وجريت بالسكين
ع التقفيصة عشان تقصف عُمْر المسكين
شِرِب الشوربة ولهط السدر مع الوركين
وبَرَم شَنَبه وأعلنها بكل استهزاء :
****
أنا يا " نجفجف " مش عيان بل زى الجن
بس بحُكم الخبرة وبرضه بحُكم السن
شايف إن سلوك مخك ضاربة وبتزنّ
وعشان كدا مش ممكن اضيّع وقتى هباء !
****
نجفة قالت له خلاص يا حسب هاسمع لك ، قول
قال لها بس بشرط يكون بُقّك مقفول
وان عَلّقتى بكلمة هاسيب البيت على طول
وانزل اروح القهوة واسيبك كالبلهاء !
****
قُصْر القول حسب الله اتكلم ، فضفص ، قال
مصر يا نجفة بخير وهاتبقى عال العال
لو بطّلنا خداع وهيافة ولعب عيال
قبل دا كله كمان لو بطّلنا استفتاء !!