استفتاء

استفتاء
سيد الموجى
استفتاء ، استفتاء ، استفتاء
لعبة لا فيها ضمير ولا منطق ولا أخلاق
وان كان فعلا صف التسعات المعهود
مش موجود لكن مامنعش وجود الداء !
****
صِحِى م النوم عمك حسب الله وقال فيه إيه ؟
قالوا الدستور عايزين ياخدوا رأيك فيه
قال " دستور يا اسيادى " وفرفر ، أُغمى عليه
كانت صدمة كبيرة وداخوا لحد ما فاق !
****
قول هيلا بيلا شالوه ولحد اللجنة خدوه
كتبوا علامة صح اياها ولا سألوه
يعنى خلاصة اللعبة بحالها يا خلق يا هوه
عُطْل مصالح وانتقالات وجبل أوراق !
****
عمك حسب الله الغلبان روّح ع البيت
نجفة مراته قالت له : اتأخرت اتخضيت
عايزين عدس من الجمعية ورز وزيت
قال لها بكره العيشة يا نجفة هاتبقى عراق !
****
فقعت كام زغرودة لزوم هَبَل الستات
ع السعودية نويت يا حسب والا الإمارات ؟
بركة يا اخويا ان احنا هانلعب بالدولارات
بعد ما كان بياخدنا الفقر لحيث يشاء !
****
قال سعودية إيه يا " نجفجف " فوقى امّال
دا احنا خلاص ودّعنا الفقر ووَقْف الحال
كلها فركة كعب ونستَقْدم عمّال
من تايلاند وبنجلاديش والواء الواء !
****
قالت مالك ياسى حسب الله الشر بعيد
قال لها أبدا ، مخى تمام والصحة حديد
بعد صيام رمضان مش برضه بييجى العيد؟
والعيد جانا يا نجفة خلاص والبال اهو راق !
****
سمعت نجفة كلام جوزها رقعت بالصوت
ما هو ضَيَعان العقل مصيبة تفوق الموت
الراجل كان ملْو هدومه وبقى هلفوت
قال لها عيب يا وليّه بلاش تخريف وغباء !
****
نجفة قالت له يا " حسبو" يا اخويا انا خايفة عليك
وهاقوم حالا اولّع كف بخور وارقيك
والا ان كنت بعافية يا اخويا فى داهية الديك
هادبحهولك زى ما قال قرنى الحلاق !
****
هزّ دماغه وبص لها بكل اشمئزاز
قرنى وديك وكلام فارغ زى الألغاز
احنا خلاص مابقاش يلزمنا بلاد الجاز
حد قدر منهم يعمل مترو الأنفاق ؟!
****
الاستفتاء يا " نجف " هيحقق الاستقرار
زى ما قالوا ، وبكره يزوّد الاستثمار
تعرفى إنى حقيقى يا نجفة كنت حمار
بس بقيت شىء نادر بين كل الأشياء!
****
ماقتنعتش الحُرْمة وجريت بالسكين
ع التقفيصة عشان تقصف عُمْر المسكين
شِرِب الشوربة ولهط السدر مع الوركين
وبَرَم شَنَبه وأعلنها بكل استهزاء :
****
أنا يا " نجفجف " مش عيان بل زى الجن
بس بحُكم الخبرة وبرضه بحُكم السن
شايف إن سلوك مخك ضاربة وبتزنّ
وعشان كدا مش ممكن اضيّع وقتى هباء !
****
نجفة قالت له خلاص يا حسب هاسمع لك ، قول
قال لها بس بشرط يكون بُقّك مقفول
وان عَلّقتى بكلمة هاسيب البيت على طول
وانزل اروح القهوة واسيبك كالبلهاء !
****
قُصْر القول حسب الله اتكلم ، فضفص ، قال
مصر يا نجفة بخير وهاتبقى عال العال
لو بطّلنا خداع وهيافة ولعب عيال
قبل دا كله كمان لو بطّلنا استفتاء !!

استاذنا الجميل سيد الموجى
دمت مبدعا
حالة حوارية جميلة
تحياتى لك

وتستمر الاستفتاءات...
هذه تذهب وتحل محلها اخرى..
وتستمر الحياة...
وتبقى الاستفتاءات..
ولايبقى الانسان..

ايهما ياناس افضل
ايها قيمة
الاستفتاء
ام الانسان

كاننا لن نتخلص من هذه اللعبة


حوارية رائعة

محبتي وتقديري
جوتيار

وتستمر الاستفتاءات...
هذه تذهب وتحل محلها اخرى..
وتستمر الحياة...
وتبقى الاستفتاءات..
ولايبقى الانسان..
ايهما ياناس افضل
ايها قيمة
الاستفتاء
ام الانسان
كاننا لن نتخلص من هذه اللعبة
حوارية رائعة
محبتي وتقديري
جوتيار

عزيزى / جوتيار تمر
أشكر لك مرورك الكريم
وردا على سؤالك أقول إن االإنسان هو الذى يقوم بالاستفتاء " إذا ذهب ليدلى بصوته طبعا "
وبالتالى فلإنسان فى هذه الحالة يكون أهم من الاستفتاء
ولكن فى بعض الأحيان يتم الاستفتاء " بدون ناس " والغريب أننا قد نقرأ عن إقبال غير مسبوق للتصويت وفى هذه الحالة يكون الاستفتاء ولا شك هو الأهم
عموما يا أخى كل استفتاء وانت طيب

استاذنا الجميل سيد الموجى
دمت مبدعا
حالة حوارية جميلة
تحياتى لك

شاعرنا الجميل د 0 فوزى أبو دنيا
شهادتك أعتز بها وأفخر
ولكن من دواعى فخرى أيضا أننى لم أذهب للاستفتاء
دمت ودام إبداعك

	" استفتاء ، استفتاء ، استفتاء لعبة لا فيها ضمير ولا منطق ولا أخلاق وان كان فعلا صف التسعات المعهود مش موجود لكن مامنعش وجود الداء ! " ياعمدة ماينفعشى أعلق بس من حقى أعلن إعجابى ورفع راية لك بعمادة العامية وهذا شرف لها سلام يا أستاذى وأدعو صديقى د. فوزى وكل مسئول فى الصفحة أن ينتظر نصوص سيد الموجى لتثبيتها على الفور فهذا أفيد للإخوة المشاركين كى نتعلم جميعاً كيف نكتب وخير دليك التربيعة الأولى أدعوا الجميع لقراءتها مرات ومرات نجد بها الخبرة والحنكة وكل شىء هكذا يكون دور العامية ليس رص كلام إنما رسالة سنحاسب عليها إذا قصرنا تحياتى مرة أخرى

	" استفتاء ، استفتاء ، استفتاء لعبة لا فيها ضمير ولا منطق ولا أخلاق وان كان فعلا صف التسعات المعهود مش موجود لكن مامنعش وجود الداء ! " ياعمدة ماينفعشى أعلق بس من حقى أعلن إعجابى ورفع راية لك بعمادة العامية وهذا شرف لها سلام يا أستاذى وأدعو صديقى د. فوزى وكل مسئول فى الصفحة أن ينتظر نصوص سيد الموجى لتثبيتها على الفور فهذا أفيد للإخوة المشاركين كى نتعلم جميعاً كيف نكتب وخير دليك التربيعة الأولى أدعوا الجميع لقراءتها مرات ومرات نجد بها الخبرة والحنكة وكل شىء هكذا يكون دور العامية ليس رص كلام إنما رسالة سنحاسب عليها إذا قصرنا تحياتى مرة أخرى

الحبيب الغالى الشاعر الجميل / علاء عيسى
لا أملك أمام كل هذا الكلام الجميل الذى قلته بحقى إلا أن أحنى هامتى احتراما وتقديرا
وأرجو من الله عز وجل أن أكون عند حسن ظنك بى دائما
دمت بكل خير