لما سمعت المطرب ( الكبير ) سعد ( الصغير ) يتغنى بحب الحمار في أغنيته الشهيرة ( بحبك يا حمار ) قررت أنا الآخر أن أرسل برقية حب لهذا المحبوب الكبير .... ( الحمار ) أغبطه فيها على هذا الحب الكبير ، وأبشره بالمستقبل الباهر الذي ينتظره في مجتمع صار يتغني بحب الحمار في الوقت الذي يجلس فيه الشباب على الارصفة بلا عمل .......
إلى صديق الحمار أقول :
أبسط يا عم حمار دا الكل غنى بِحبك
والناس في كل دار تهتف وتطلب قربك
*********
اسمك بقي في القهاوي وكمان في السيارات
بيقولوا فيـــــك غنــاوي يا مدوّخ البــــنـــــات
*********
بكره تخش الجامـعـة ويغور زمن الغبيط
ويشيّـلوك الدمــعــة وتظبط المـظـابـيــط
**********
ترن على الحمير وتظبط ف البقر
ويسفروك كمان تتفسح في المجر
**********
ويـسفــروك اوربـــــــــه في البعثة التعليميه
ومعاك يا صحبي صحبه حمير ومـيـه مـيـــه
******* ***
ويعمّلوك رجيــــــــم وتبقـى واد ذا بـيـْكــى
ومعاك حمار انتيــم يقولك هاي يا دونكي
**********
تتمشى ف العجوزة ومعاك حمارة جميلة
وتمزمز ف الازوزه ولا الف ليلة وليلـــة
*********
هــيـوكلـوك بـولبـيـــــف معدش خلاص برسيم
وعشاك تيك اوي خفيف مع علبة ايس كــريم
********
لا هتتعب في موصلات ولا وانت بتشتري عيش
وهتطلع في القنــــوات ومش هتـــخش الجـيـش
**********
هتعدي ف الانتخابات وتكون صاحب قرار
وتــحللـنـا الازمــــات ف الليل وف النهار
***********
وهتبقــى وزيــر كبير ومش بعيــــد رئـيــس
تاكل في الصبح كيزر والليل تاكل سوسيس
**********
وهتطلع ف الجرايد يوماتي وف الاخبـــار
ويقولوا ف القصايد تسلم وتعيش يا حمار
**********
أصلك بقيت حبيب واسمك ف كل دار
وكل شاب بيدعي يا رب ابقى حمــار
مع خالص حبي لكل .......... حمار
محمود جابر