جمال الدنيا

جمال الدنيـا

[SIZE="3"]


يا للى انت ساخط ع الحياة ..تقدر يا أخى تسيبها ..
بتقول كده ساعات .. و قلبك ميت فى دباديبها ..
هـّوه ده طبعها .. تعدل ساعات و تميل ..
وان مالت يا صاحبى ..إياك تعايبها .
إن كنت عايز تعيشها .. عليك بالحب ..
هـّوه طريق السعادة .. دى الدنيا دى تتحب ..
وان كنت تكره و تمقت , الحياة تكرهك ..
و تعيش تعيس فيها و كسير القلب .
شوف الجمال فى زهرة , منّـورة ع الغصن ..
بلبل ف ريحها يغنى للحياة و يحن ..
إن كانش يعمل كده , يركب دماغه الهم ..
ييجى عليه يوم ينسى الغنا و يتجن .
سحر البراءة فى وجه طفل صغـّير ..
من بسمته , الدنيا بأسرها بتنور ..
حتى ان صرخ أو بكى , دا مش زعل م الدنيا ..
لكن لشوقه إليها .. خايف إنها تتغير .
و لا ّ قمـر منتحل صورة فتاة بشرية ..
ماشية ف وقار , جمّـعت أخلاق على حورية ..
تحسبها كائن و هابط م السما ع الأرض ..
أبدا , دى كائن م البشر , حتى اسمها بدرية .
شوف الصفا فى القلوب : رايح لسيّـدنا الحسين ..
راجل عجوز أو فتى , قاصد يصلى ركعتين ..
خالى الفؤاد من مشاغله إلا بذكر الله ..
يقرا م الذكر الحكيم ما تيسر : سورة أو سورتين .
سمكة ملونة فى المية رايحة و جاية ..
تلعب , تهزر , و مبسوطة متين فى المية (200% )
و تعاكس فى خلق الله من الأسماك , و تتدلع ..
أصل الشقاوة طبعها و الرقص جـّوه المية .
جدول من الفضة على شطه الشجر طاطا ..
يشرب , و أطيار شقية بين الشجر نطاطة ..
و النخل عالى و السبايط نازلة ..
و الغيطان خير : فاكهة و خضار و بطاطة .
شوف الحمار : نظريته (لامؤاخذة ) ..
لا هـّمه زعيق عربجى ينخزه كام نخزة ..
ماشى سعيد و رامى الهم ورا ديله ..
مبسوط و بينهق – نغم – و حياته كلها لذة .
يا فتى : إن كنت عايز جمال .. ييجى الجمال يلاقيك ..
دى الدنيا فيها يا فتى .. كل ما يرضيك ..
عايز سعادة أو تعاسة ؟ كل دا موجود ..
قول اللى عايزه يا فتى .. ربنا يهديك .

مصطفى درويش سلام

[/SIZE]

هو الامل والتفائل فى ابداعية جديدة للمبدع مصطفى سلام
ياخذنا هذه المرة مصطفى سلام الى النور لنرى جمال الحياة فالحياة ليس كل مافيها قبيح
الحياة جميلة عندما ينظر الانسان لخارجة ويرى الطبيعة خلق الله البديع
تحياتى لك ولفكرتك الجميلة
دمت بود

إن مقطوعتى تلك قد أسكرتها كلمات الناقد الأريب الدكتور فوزى أبى دنيا !!
لقد علقت - يا سيدى - عليها وساما .. أمتن لك لوضعه .
مصطفى سلام

ربنا يهدي الجميع ياشاعرنا العزيز

شوف الجمال فى زهرة , منّـورة ع الغصن ..
بلبل ف ريحها يغنى للحياة و يحن ..

ايوه صح

تسلم ياعزيزي مصطفي سلام

دمت لنا بهذه الروح الجميله .. وهذا القلم المميز

رعاك الله

مصطفى
احل شئ إن يبقى للشاعر هدف بيحركة ويحاول يزع اي شيئ جميل حواليه
ربنا يوفقك