(1)
بحب البوح لأوراقى
وبأتمنى ف يوم تقدر تشيل همى
تسمعنى موسيقى كلها منى
ما أنا أصلى .. بحب أسمعنى فى سكوتى
وبأتوضى بمرارة جرح طهرها الألم فيّه
وأصلّى ع الشهيد أصله ...قريب منى.
(2)
الأوله ملقى .. فوق الطريق مكفى
قالوا نزيدك مر ؟
... أنا قلت مستكفى
والثانيه مصلوب فوق الضنا دهرين
قالوا نزيدك عمر ؟
قلت اللى فات يكفى
(3)
كتير بأبكى على حلمى
وبأتباكى على ضعفى
ما أنا ما اقبلش غير انى ..أكون قديس
ومثلى كلها منى
أصب البحر فى جروحى
وأتظاهر بحب الآآآآآآآآآآآآه
وأنا جوايا ميت صرخه
ما أنا المصلوب على غرورى
(4)
قالوا الوليد بكاى ... أنا قلت ما بيده
لو تنشرى الأفراح .. بالعين أنا اشريها
قالوا القمر ناير ... أنا قلت يا بعده
لو تشتعل سماوات ... إيش للضرير فيها
(5)
بنفس الخيط ..
...بأرقع في الجدار يمكن يحوش النور
... وأكتف بكره وإمبارح ..
.. علشانة أفضل محلك سر
وما تنفض شرنقتي ..
.. فأخرج للغريب وحدي ..
....وأنا ... أعمى
(6)
عوّاد أنينه بين قلوب الخلق زفرة نوح
شق الفضا بآهاته يبغى البوح
صرخ الغريق جوّاه لفين رايح
جرحك لصيق روحك.. يا وليدى فين ما تروح
(7)
طريق يائس ..
.. وليل مخنوق بسهرايه
وحبة مجذوبين هايمين ف ليل تانى
وريحة ياغمه منصوبة ف خماره
وأنا وأنت ..... وبلاش نرقص ....
.... .....علشان مدبوح
(8)
أديب نفسى ..
اتوه وحدى ..
فى بحر حروفى .. يمكن أتوه
ولو مره ألاقى السكه ... أتضايق
علشان عارف .......
موت... ف آخر الرحله كلمة
(9)
لما الدموه جوا العيون تتزل
والصدر يضيقّ وما يلقى الآه
والضهر من شيل الهموم ينحل
والجرح يكبر وف ايدينا دواه
اعرف بإن الكون ميزانه اختل
والقول يضيع وما يتفهم معناه