حنظلة.....................
ماعادشي فاضل ف اللي باقي كتير
رجلك خلاص نملت
من عتمة المشاوير
وخطوط أيديك اتمحت
من كتر ظلم الغير
ماتدرشي وشك لنا
لاحسن ضلامنا سواد
دانت الشعاع والضيا
وانت الأمل والزاد
أوقات كتير باظلمك
والظلم ف طباعنا
ماهمناش جرحنا
ولاكتر أوجاعنا
وكتير بنعشق غلط
لافرق فيه عندنا
بين اللي خد عمرنا
واللا اللي جووعنا
حبيت أطل عليك
ماعرفتلكشي مكان
هو انت من دمنا
وف دمك الإنسان
ولا انت نور ربنا
داير ف كل مكان
داير ف كل مكان
****************