هم چنت جاهل
هم چنت جاهل دريت بهاي
لو محتاج اگلك
چانت امي وجدتي تسولف عليك
وچنت احبك ما املك
وچنت اگللها يجده شگد أحبه
تگولّي أزغيرون بعدك
واني من گد الوكاحه راددتها
وگالت اسكت لا اصيح أعليك جدك
وجاني جدي وگال هايبني شأجاك
گتله أحبه وشنهو ردك
گال يوليدي العزيز شرايد احچي
هو حبه يوازي حبك
گتله وبهاي اختلفنه وراح اسولف
وادري يمكن راح ازعلك
انه احبه أبگد حياتي بگد خواتي
وحبه بگليبي تملك
وارد اگلك حبه أكثر من عدد
ما خلق ربـــــــــــــــــــك
ما أحس عندي شعور ابغير حبه
ترضه ما عنده شعور يصير ابنك
گالي اتبشر يماي العين وأتدلل عليه
گول كلشي أتريد ما يمكن أردك
گتله من اكبر يجدي اتساعدوني
گال ابشر وافتخر لن أني جدك
ومن هذاك اليوم واني وكل حياتي
اتودعت يا روحي عندك
گمت اسابگ كل سنيني وردت اكبر
حتى يحبيب أخدمك
وأكبرت واتعلمت وحتى بالجيش أخدمت
وصرت هم أني مهندس حتى أعمرك
يا وطن يابو ألائمه شگد عزيز
ياجبل يابو الشموخ اشلون أضمك
مشتهيك وعايش بروحي تراك
شلون اقبل يا گلب واحد أيقسمك
الله من سواك يا ارض السواد
خالك العباس يمكن والرفاعي أيجوز عمك
واجو حكام العماله الفاسدين
وبأتفاقية النذاله أنباع دمك
آه يا انت شعزيز وما تذل
ما يهمك كلشي همك لا يهمك
الشاعر محمد الفهد
الفــــــهد ابنـــــك
رد مع اقتباس
المشاركة الأصلية كتبت بواسطة محمد الفهد
