النصيب
بعد كـل الحب اللى احنا حبيناه
بعد كل العمر اللى احنا قضيناه
بعد عشـرة اتكلمـوا عنها البشر
بعد رحلة ياما قاست م القدر
بعد ما كنا خلاص وصلنا للأمان
بعد ما اتصالحنا خلاص مع الزمان
ليه فى اخر خطـوة بينا نفتـرق
ليه سنين الحب بالنار تتحـرق
ليه نضيع من ايدينا عمرنا
ليه بنكسـر روحنا ونبيع حلمنا
نفسى اعرف ياللى شفتـوا حبنا
،،،،،،،،،،،،،
نفسى اعرف ليه حبيبى قلبه خان
ليه بيقـدر يقسى ع الحب اللى كان
أى دمع أو فرح مابقاش يساوى
أى شئ فى الدنيا مش ممكن يداوى
جرح قلب ضاع ومش لاقى الحنان
...........................................
فين حبيبى فين سعادتى وفرحتى
اللى كـان بيملى كونى ودنيتى
مـش مصـدق أنه باعنى للألم
أنه سابنى وحدى أمشى سكتى
هـى دى نهاية الشـوق والحنين
هى دى أخرة حبيـب يوفى السنين
جوة منى نار بتحرق الأمل
جوة قلبى قلب تانى عاش حزين
...........................................
ليه يا عمرى ليه بتطفيلى الشمـوع
مش جزاء قلبى يموت بين الضلوع
كنت عارف انى فى بعادك هضيع
كنت عارف انى هغرق فى الدموع
رغم كل حبى وأحساسى الكبير
رغم انى صنت وأديتك كتير
رغم كل شئ زرعـت دمعتى
سبتنى وحدى فى نار أصعب مصير
.............................................
مستحيل مهما بكيـت من الألـم
مستحيل يقـدر يعوضنى الندم
عن حياتى وعن شبابى اللى انتهى
عن سنين عمرى وقلبى اللى اتظلم
مهما أوصف طعم وعذاب الجراح
مهما يعلى صوتى ويزيد النواح
لو هقضى باقى عمرى فى الندم
مش هرجع لحظة واحدة من اللى راح
.............................................
ياللى عشتوا عمركم من غير الام
جربوا وارموا قلوبكم فى الغـرام
شوفوا قلبى وأسألونى هتعرفوا
اللى يعشق فى الزمان ده يساوى كام
أصبح الجرح فى حياتنا من الطبيب
والخيانة بتيجى من أقرب حبيـب
والمشاعر الجميلة الحلوة تاهت
وسط بحر كلمة سموها النصيـب
..................................
.....................
........