ومرورًا بعمود تحليلي وتفاصيل حادثة وكام تقرير..
بتحسسني بإني بتابع ماتش مسَجَّل..
شُفت نتيجته امّا اتذاعت من ست شهور..
نفس الجبهة ونفس عناصر بتناور
علشان الجبهة التانية تسَلِّم..
و فـ لحظة وللخَلْف يدور ترتيب الأول
إن الحارس.. مابقاش واقف جنب المرمى
علشان أصله مافيش للعارضة حديد يتدَقّْ..
إن ولاد العم دعُونا ف يوم جَمَعونا
حطوا لنا اللحم المتلَغَّم بالمَعلوم.
إوعى تقول لي إنه هيتزحلق من طبقه وهيميل
على ودنك ويقول (حاسب أنا مسموم)!
فهمني جنابك –لا مؤاخذة- اللحم هينطق
قُمْنا طبَخنا السم ودُقنا نقول الناس هتصدق بردو
المسموم لو حتى اتكلم ع السُّفرة هنحلف
مِن بَعْد الموتة بلحظة بإن الصوت
كان جايب آخر الدنيا ودونًا عن طوب الأرض
وقال لـ"مُحَمَّد" كلمة حق؟
لسة بقول لك ماهو ده الفرق!
مع إنه لا كان بالنسبة له الماتش مسَجَّل..
ولا شاف الأحداث بالكلمة ف كُتُب السيرة..
إن "مُحَمَّد" كان بيشوف الكون ببصيرة..
زي البَحَّار اللي بيقْسِم ضهر الموج..
يتفرع له البحر شوارع بين شطّين..
لو هتقيسها بمين يتطَوَّع يبقى "مُهاجم" زَيَّك.. عِدْ
لو هتقيسها بكام قاصد يتعدي حدوده
وخَد إنذاره وسَلّم.. عِدْ
بس هقول لك: "كم مِن فِئةٍ" لا تَرجو لله وقارًا
قام سابهم للدنيا تسَمِّن فيهم..
لجل ما يسْبَق سيف الدهر إليهم فجأة..
بس انا زي ما مرة سألتك هو اللحم هينطق
ويقول "أنا متسمم" علشان مين؟
جاي دلوقتي وبردو بقول لك:
طب والدهر يجَرَّد سيفه من الغِمْد ويحصد رقابيهم