التغيير
التغيير
التغيير عندنا مرفوض
والمطلوب والمفروض
إن احنا نعيش ومانشكيش
ونكون على طول
ف ركود وجمود
مخنوق صوتنا
ميت فينا
حلم العمر.....
ونبض حياتنا
زى الميه البايته
الراكده ف قلب البركه
وان فكرنا ف يوم نتحرك
تبقى الحركه بس ف دايره
زى البقره الدايره ف ساقيه
مغمى عينيها
والمكتوب لينا وليها
نفضل نقطع ليل ونهار
نفس السكه والمشوار
لأنه ف رأى جناب الوالى
إن طبيعة الوضع الحالى
مش محتاجه أبداً غير
إن احنا نوفر الاستقرار
ليه ولغيره
ودا بالطبع لأن مسيره
بكره يشجع
فرص الكسب والاستثمار
اللى مؤكد باستمرار
ح يزيد ويزيد
من نفخ جيوبهم
واحنا جيوبنا كفايه عليها.....
نحط إيدينا ونهرش فيها
التغيير عندنا ممنوع
ف الأشخاص
أو ف الموضوع
حد يقوللى نغير ليه؟
والمردود من ذلك أيه؟
يعنى العقل ازاى يستوعب
إن الباشا يسيب الكرسى....
وييجى مكانه سعادة البيه؟
التغيير عندنا بهتان
من أيام فرعون وهامان
من غير طعم وريحه ولون
ولحد ما تيجى نهاية الكون
ح نقوم وننام
و نعيش ونموت
ونشوف فرعون
بيشوطنا برجله
عشان يرمينا ف إيد فرعون
التغيير على رأى جنابه
لازم يبقى له أسبابه
ومايبقاش كده بالجمله
عشان ما نهزش سعر العمله
لازم يبقى بخلع الضرس
والتنقيط و التقسيط
والموضوع محتاج توقيت
والتوقيت محتاج تصويت
والتصويت محتاج صندوق
والصندوق مش زى زمان
من خشب الورد وخشب الزان
الصندوق متروس بالسوس
اللى بينخر ف الأبدان
الصندوق مليان أحزان
ع المنهوب والمسلوب
م الحباك للهباش،
للهليب للمسنود
والأسلوب محتاج تغيير
والتغيير عندنا مرفوض.....
إسكندرانى
22/6/2004
رد مع اقتباس
