بَلَدْ .. منْ جِدِيدْ بِتِتْوَلَدْ
محسودة يا بلدي
وللا إللي حاصل إيه ؟
الثورة جت بدري ؟
وللا الشعب بدري عليه ؟
الكل مستعجل
والصبر فين أراضيه ؟
هو الميلاد كان سهل
وللا الثمن يرضيه ؟
الفجر لما طلب
بالدم قام يرويه
يشهد ميدان تحرير
وإللي جرا لنا فيه
الإيد كانت في الإيد
نفسي تعود لياليه
....................
بلد يا ناس !!!
ومش أي بلد
بلد حضارتها تِغَطِي الكون
والنهاردة مهما يكون
بلد من جديد بتتولد
بلد خمسة وتمانين مليون
وكل يوم بِنزِيد عدد
.......................
بلد ولا أغلى ولا أحلى
بلد في عِنَية كل يوم تِحْلا
إزاي يطلع من قلبها
ناس قاسيين .. مش مِنَها
عاوزين الحياة وَحْلَة
..........................
بلد في يوم
لا قالت .. ولا سأَلِتْ
ولا غابت .. ولا نامت
ولا خَافِتْ .. ولا تِقِلِتْ
ولا أنت مين ؟
ولا اسمك إيه ؟
ولا مسلم .. ولا قبطي
ولا انْجَنِتْ
عشان نيجي نقول عِقِلِتْ
..................
بلد طول عمرها لِلكُلْ
اللقمة واحدة
والعيشة واحدة
والضحكة لما تِطُل
واللون من سَمَار نيلها
كنا نِغَني لها
لكن .. قلبها أبيض
أبيض بلون الفُلْ
....................
الميَة واحدة
والشمس واحدة
وبرضو نَفْس الضِل
المحنة تجمعنا
والفرحة تِرَجَعْنا
لبعضنا ونْهِلْ
شايلين عَلَمْ واحد
ننادي ف نَفَسْ واحد
وربنا الواحد
ماشفنا زيك بلد
ولا لينا غير أرضك
ولا لينا غيرك صاحب
ولا لينا غيرك خِلْ
....................
فاكره يا مصر ... ف سينا
يا تري يوم ما عبرنا
قالوا العبور دا لمين ؟
ولا اللي عبروا مين ؟
الدم كان واحد
وكان المصير واحد
حتي الندا واحد
الله أكبر .. الله أكبر
كانت ندا الملايين
......................
ولو حد قال قبطي
وللا أقول مسلم
يقولوا دول مجانين
كنا في إيد بعض
ولا حد فرقنا
ولا حد كان يقدر
الكل مصريين
..................
بس النهاردة غريبة
بسمع كلام تاني
بسمع ندا تاني
شايف فتن سودة
شايف خراب ... وحزين
.......................
إيه اللي فرقكوا ؟
مين دخل بينكوا ؟
ألا إحنا نفس الناس
وللا إحنا ناس تانيين ؟
اِلطُف بنا يارب
إنت الأمل يارب
وحدك وصاحب الأمر
وحدك وصاحب الدين
وحدك وصاحب الدين
........................
شعر : د هاني ابوالفتوح
الكويت – فجر الأربعاء 11 مايو 2011