الأمرْ لله
العمر مكتوب
والقدر مكتوب
ومهما يكون النصيب
غالب وللا مغلوب
.................
كتير حاجات بتحيرنا
وكتير حاجات بتغيرنا
بس الزمان لو صبرنا
هنلاقي كله
عند القدر محسوب
....................
حكمة الله في الدنيا
إن الحياة دايما فانية
وينتهي العمر في ثانية
مين فينا عاش
ومالهش ذنوب ؟
.......................
لو تسألوني عن رأيي
من غير سؤال أنا مش وياه
ظالم أكيد
وظلمه واقف يستناه
زي العمل الإسود أُدامه
مكتوب على وشه وقفاه
يوم القيامة مفيش مهرب
ولا فيه هناك ريس ولا جاه
لا هتنفعه فلوس الدنيا
ولا العذاب له حبل نجاة
كافي عليه حساب الآخرة
كافي إللي راح وقتها يلقاه
....................
أول سؤال
قول إيه دينك ؟
جبت منين قول ملايينك ؟
عملت إيه قول في الدنيا ؟
وعملت إيه قولي لدينك ؟
يقول ساعتها أنا كنت رئيس
وحاكمها بالعادلي وببوليس
تلاتين سنة .. يا كتر الفقرا
تلاتين سنة .. يا كتر المحابيس
....................
بالله قبل ما تحاكموني
هاتوه كمان حاكموه .. إبليس !
كان ليل نهار بيوسوس لي
وساعات كتير بيحذرني
وقبل الفطار بيفطرني
وبعدها أتربس ترابيس
......................
تقولوا .... شمال
وتَعَبْ العِيشَة .. وتَعَبْ عُمَال
وكلام في فلوس وكلام في المال
والشكوى نازلة ليل ونهار
من غلب الحال
..........................
أقول أنا .... يمين
دا كلام خايبين
ناس عطلانة وناس كسلانة
ناس نايمين
ناس عالة .. وناس حاقدة
ناس حاسده
كل إللي عنده يدوب ملايين
.....................
الناس على إيه حاسدينك
وقت الحساب تطلع عينك
لا هتنفعك هنا ملايينك
ولا البطانة إللي تعينك
وحدك هنا من غير حراس
وكلهم مش نافعينك
......................
حساب الآخرة عسير وأَحَدْ
ربك عمره ما سابه لحد
بيحكم بين الناس بالعدل
وياخد حق الناس من بعض
أصعب حاجة حساب الحكم
وسؤال الحاكم وقت الجد
ولو فكرنا نقيم الحد
حساب الله أصعب وأشد
........................
الدنيا ياما نشوف فيها
وكل يوم بنشوف عجب
قبل ما تنتهي القصة
اسمعوا كل حكاياته
هاتوا لنا أستاذ فى الأدب
يكتب لنا قصة حياته
منين بدأ و أما انتهى بخيبة وتعب
ويقول لنا عن ذكرياته
وأوامره بالظلم والذل لما تتكتب
ورأيه في كل اللي ماتوا
و مين إللي كان السبب
ربك لوحده المنتقم
جبار على من ظلم
ولكل غالب يوم ولازم ينغلب
العدل ... إسمه
وعدله بميزان من دهب
واللي هيزعل م اللي أقوله
وللا يملاه الغضب
قبل الغضب اصبر واستنى
كل اللي مات له شهيد
في الجنة
فكر وقول .. كلنا هنموت
بس الموته دي
لو ليا أنا ... أنا كنت أتمنى
خلوا الرسول قدوتنا معاه
وإللي جرى يوم فتح مكة
إحنا بشر ما احنا ملايكة
جينا الحياة علشان سبب
ومشينا منها بردو لسبب
ربك قدر .. ربك كتب
ربك عطا .. ربك أخد
ربك يعز .. ربك يذل
سبحانه وحده إللي وهب
سبحانه وحده إللي وهب
شعر د هاني ابوالفتوح
دبي الخميس – 5 مايو 2011