قصيدة : ميدان و نار ودخان

مِيدانْ وِنَارْ وِدُخَانْ !
ميدانْ ونارْ ودخانْ
وبارود في كُل مكان
وزمان غير الزمن ده
كفاية عليك يا زمان
مصر الحبيبة الغالية
عَايشه على بُركان
........................
واحد هناك في وسطنا
بِيْغِشنا مُشْ مِننا
واحد بيحرق في البلد
إِحرق هنا .. وَلَّع هنا
واحد بيحرق دمنا
وراية سودة بِتِعْلى فوق
وإحنا هناك
وِسْط الحريقة بْنِتْحَرق
والبلد تِتْباع في سُوق
..........................
فين الضمير يِشْتِري
وفين اللي باع
دم اللي جاع
لسه بينطق من بعيد
يا بلد
رُوحي اكتبي كِلمة وداع
........................
رُوحي احرقي كُتُبْ التاريخ
اللي كتير كَتَبِتْ عليك
رُوحي امسحي شَعْرِك
واغسلي دمعة عنيك
روحي اكْدِبي
قولي ولادي مابيحرقوش
واللي اتحرق رَمْيَاه اِيديكْ
مَلُهْش لازمة يتحفظ
ولا نِذْكُره ولا نِكْتِبُه
ولا حتى نعرف مَذهبه
...................
عَدِّيتْ عليكي في يوم غَريب
قلت أشوف مين اللي صاحبك
ومين عَدِوْك
ومين حَبيب
لقيت ولادك بيخنقوك
ولقيت مفيش فيهم طبيب
ولقيت مُنَاهُم يِقْتلوك
ويورثوك ويْقَسِموك
ويِإْفِلوا نجمك ياغالية
ويتِْمَنُّوا لو شمسك تغيب
...........................
خلاص بقت فوضي كبيرة
الكل سَاب
ومفيش رقيب
ومفيش حساب
ومفيش ضمير نِسْأَله
إيه اللى ناوي يعمله
مات الضمير فينا خلاص
مستنيين ساعة العزا
قِيموا الحداد
خلوا الجنازة كلها
بطول البلاد
ماتت بهية من زمان
من يوم ماضاع فيها الأمان
من يوم ماباعوا أرضها
ودلوقتي ساكنين الليمان
.......................
بس الزمان
بيقول يادنيا مستحيل
بهية لايمكن تموت !!!
مهما يطول فيها السكوت
بهية واقفة هناك بعيد
تستني جيل من بعد جيل
بتقول هييجي يوم أكيد
وابْنِي الحقيقي ياخد بإيدي
تِرُدْ روحي من جديد
ويرتوى صدري العليل
مهما تصومي يا بهية
الصوم بِييجِي بعده عيد
بكرة تشوف يا زمن
وبكرة هَتْغَنْي يا نِيلْ
ياسين .. الطفل الوليد
جاي وهيرد الجِميل !!!
واللهِ هَيْرُد الجِميل !!!
كتبت عشية مأساة يوم الأحد الدامي
الكويت في 20 نوفمبر 2011
شعر : د. هاني أبوالفتوح

لم تمت أبدا ولن نقيم لها حداد ولو قدمنا أرواحنا جميعا فدا لها
ليت نيران حرفك تلفح من ماتت ضمائرهم
أبدعت شاعرنا المكرم في مجاراة الحدث حصريا بحرف بديع جاء ثورة أخرى
تحيتي الخالصة

مهما تصومي يا بهية
الصوم بييجي بعده عيد

لن ينجح النفعيون بإحراقها ما دام في أبنائها هذا اليقين
فلا خابوا ولا حزنت البهية

قصيدة تناغمت والأمل والألم

تحيتي

مهما يطول فيها السكوت
بهية واقفة هناك بعيد
تستني جيل من بعد جيل
بتقول هييجي يوم أكيد
وابْنِي الحقيقي ياخد بإيدي
تِرُدْ روحي من جديد
ويرتوى صدري العليل
مهما تصومي يا بهية
الصوم بِييجِي بعده عيد
بكرة تشوف يا زمن
وبكرة هَتْغَنْي يا نِيلْ
ياسين .. الطفل الوليد
جاي وهيرد الجِميل !!!
واللهِ هَيْرُد الجِميل !!!


سلام عليك د هاني ابو الفتوح
حين يكثر الهرج والمرج لك حق ان تكتب هذا
ولكن الله سلم اخي و اكرمنا بمعرفة الخيط الابيض من الاسود قبل فوات الاوان
والان مصر تخط تاريخها الحقيقي فليس لنا بد الا ان نقراه ونحبه لآنه سيكون تاريخ حرية
على اصول حقيقية ليست مغشوشة
تحياتي وتقديري ودمت مبدعا رائعا