لما انا فقت
بصيت كده حواليا لقيت الدنيا ضباب
لما عرفت
ما لقيت حاجه ف قلبى ب تفتح للنور باب
شفت ف قلبى ضلام متكدس كده اكوام
و لقيت روحى ف زاويه ماليها عفار و تراب
بس الحق
لما نفخت العفره ب ريق التوبه انزاح
هم تقيل كان فوق القلب و لعلع شىء
بان لى اصالته لما قرصته تحت الناب
طلعت روحى
رغم سنين الغربه و رغم بحور الغى
لسه كاتمه ايمانها و حالمه باجمل ضى
صابره و بتدعيلى اتوفق للاسباب
سبحان الله
قد ما نغوى كتير و نضل كتير و ندور
شىء جوانا بيفضل ماسك طرف النور
لجل يعود بينا لله ما نعيش اغراب
طلعت روحى
طلعت روحى دهب ع الفطره ما جنزرهاش
حب الدنيا.. اللى تعبها ما ريحهاش
و اللى خدعنى بوهم كبير و لقيته سراب
اه يا خساره
الف خساره و الف ندامه على الايام
عمرى اتعد سنين و اتعاش لحظات يا حرام
و اللى باقى لى الباقى اما الماضى سراب
شاكر ربى
شاكر ربى و حامده حامده على التوفيق
لاكن ع اللى اتسرسب منى ف قلبى حريق
نفسى و نفسى و نفسى و فين؟ العمر اهو شاب
و لا شيطانى
لما لاقانى شيطانى باميل ع التوبه و اريد
جمع ليا كل مريد جبار و عنيد
نازلين فيا دك و طالبين الاستسلام
مش هاستسلم
مش هاستسلم ابدا ابدا مش راح اعود
انا صدقت يكون لى ايمان و يكون لى وجود
ابواب عمرى اتقفلوا ما فاضل..... غير كام باب
توبت يا ربى
توبت يا ربى و ناوى يا ربى اعيش انسان
ناوى اكون اهل لتكريمك مهمن كان
ناوى اكون بالحق خليفه للرحمن
بس ساعدنى
ارمى ف قلبى يا رب يقين و صلابة حق
علم قلبى يقول لضلال الضالين لأ
لو يتفرتك غير للحق ما يدى حساب
رافت المصرى
لا اله الا انت سبحانك انى كنت من الظالمين