كلمات محمد السيد ..ولحن وأداء محمد النحاس..
أغنية كتبت لفخامة حسني لكني هنا أهديها لكل صاحب فخامة
وحياة مامة فخامتك
طيب و حياة سوزان
تسامحني عشان شتمتك
و أنا واقف ف الميدان
كان المفروض أجـيبك
و تشوف شعبك حبيبك
علشان تاخد نصيبك
مـ الحب و مـ الحنان
أنا أسف و بصراحة
أصلي ماكنتش أصيل
يا معلمني القباحة
نفسي أرد الجميل
يا مظبط أهل بلدك
أكتر من إسرائيل
هاتقوللي اللي فيها
هاقوللك فيها فيل
أنا أسف إني سيبتك
تخلع من غير حساب
كان المفروض حاسبتك
زي ما قال الكتاب
مابننساش الجمايل
و الشعب فـ قلبه شايل
و هنعمل فيك عمايل
و البركة ف الشباب
في أكتر من حريقة
و فـ كل بيت شهيد
فاكر أهل الدويقة
فاكر قطر الصعيد
طب سرطان الخضار
و العيشة الغالية نار
والمعبر والجدار
والا الفكر الجديد
أسف علشان سكتنا
طول الوقت اللي فات
وإنت مسود حياتنا
و بتسرق مليارات
دلوقتي الفرصة جاتني
و هحاسبكـ ع اللي فاتني
وهاردّ حقوق بلادي
و أخد حقي اللي مات
آسف لجمال ولعزمي
ولصفوت ولسرور
كل اللي مصو دمي
ولسه في القصور
آسف علشان سايبكم
وحياة بلدي لاجيبكم
وفي التحرير باني لكم
أحلى وأجمل قبور