قطار الموت
***
قطَّف ياريح الموت
ورد الحياه
جوه المداين والقلوب
واعصر فى دم الصبح
.....
طالت إيديك
طلل المدينه الماشيه
تحلم بالفرح والعيد
تاهت فى بطن الوجع مشاوير
.....
أمشير يا دابح
قلب الولد والبنت
ياشين
ومش واضح
حصانك الجامح
فتّح بيبان الحزن
دبلت غصون المشاعر
فى الشوارع والبيوت
.....
أرواح بتحلم بالضيا
حمام بيحلم بالسما
عيال فى شقوق المحن
بتفوت
وعيون كتير باصين
ع المصفوفين للموت
.....
ورد النهار
مُهَج القلوب
لملم شتات القلب
انزع مرارة حكمتك يا صبر
وافتح فى القلب عين بتشوف
اللى اندفن جوه الوطن
مجروح
محروق بنار الهمهمه
وثرثرات البوح
.....
عصفور جوه قفص حديد
مقفول بيبان .. شبابيك
وقلب صلب عنيد
مفتاحه فى جيوب السماسره /
البياعين /
المسئولين
وعلامة استفهام
ماشيه على قضبان
تصرخ فى وش الريح
ودن الخسيس من طين
وودن تانيه عجين
بتلخبط الاجابات
.....
إيدين بتغزل م الضنا هدمه
للوقت والمسافات
إيدين بتخنق فى الحكاوى
عيال وبنات
إيدين ما تعرف فى البنا
وتحفر قلب السكك متاهات
.....
دوامه بتشد الزمن
بره حدود الضى والسلامات
.................