فزورة
سيد الموجى
المجلس المحترم قَبَل اعتذار البيه
وهو كل اللى قاله مازال مُصٍر عليه
اللى اعتذر مين لمين ؟ فزّورة جايزتها
أكبر رقم فى الفلوس عدّيته ( ألف جنيه ) !
****
ومعذرة يا أمير المؤمنين يا ( فاروق )
لقبك شالوه – للأسف – مخاليق فى غاية السوء
آخرهم اللى بيفتى فى أمور الدين
بدون يقين ، بل بسطحية وقلة ذوق !
****
إسلامه – بصريح عبارته – أربعة أركان
مع إن إسلامنا خمسة فَرَضهم الرحمن
قلنا له ومازلنا بنقول له مافيش فى الدين
تكعيب ولا سيريالية جديدة يا ( فنان ) !
****
سمع الكلام اتلوى ، نَوَى الاعتكاف فى البيت
قلنا ياريت الكلام دا يكون بِجَد ، ياريت
لكن يا فرحة ما تمّت عاد لنا تانى
وكأنه بيقول لنا أنا غصب عنكم جيت !
****
فزورة سهلة ف زمن صعب ومصايبه كتير
متغلّفة بادّعاء حرية التعبير
بادئة بكاريكاتير مسىء للمصطفى المعصوم
واليوم بتكمل بفتوى فى الحجاب لوزير !!