يَــــا عْقْـــلِــــي
نْبْنِي عْلْ الرّْمْْلْ مَا نْبْنِي دَارْ
أَوّْلْ رِيحْ تْهْبْ تْخْلِيهَا وْتْدِّيهَا
مْهْمَا عْلِّيتْ سْوَارْهَا طِّيحْ وْتْنْهَارْ
تْرِيبْ تْدّْمّْرْ بْاللِّي سَاكْنْ فِيهَا
يَا عْقْلِي نُوصِيكْ تْفْهْمْ فْلْشْعَارْ
يْلاَ جْلْسْتِ كُونْ مْعَ ناَسْ نْبِيهَة
خْلِّيكْ مْنْ صْحاَبْ الْعْقْلْ الْمْطْياَرْ
يْنْقْزُوا الْوْطَا وْالْحْفْرَة يْطِيحُو فِيهَا
جاَوْرْ الْحْقْ فْرَايْكْ تْكْلّْمْ بْجْهاَرْ
لاَ تْغْلْطْ غْلْطَة كْبِيرَة تْنْدْمْ عْلِيهَا
إِذَا غْلْطْتِ فْخُوكْ قْدّْمْ الْعْذَارْ
السّْمَاحَة تْحْيِي الْقْلُوبْ الْعْدَاوَة تْدْمِيهَا
لاَ تْغْوِيكْ دْنْيَا تْتْحْكّْمْ فِيهَا الْقْدَارْ
لاَ تَامْنْهاَ يُومْ لاَ تْسْلّْمْ لِيهاَ
ياَ ماَ ناَسْ كْثِيرْ غَابُو عْلْ الاْنْظَارْ
شْحْالْ مْنْ خْطْوَة مْثْلْكْ خْطَاوْ فِيهَا
يْلاَ تْنْغّْصْتِ يُومْ وْمْحْنَاتْكْ الْكْدَارْ
قْصْدْ مُولاَكْ بْدْعْوَة وْدّْلّْلْ فِيهَا
سْبْحَانَهْ اللِّيلْ جْعْلْ مْنْ بْعْدُو نْهَارْ
ظْلْمَةْ اللِّيلْ تْزُولْ نُورْ النّْهَارْ يْضْوِيهَا
طْلْبْ السّْلاَمَة فْدِينْكْ وْدْنْيَاكْ خْيَارْ
قْنْعْ بْالمُوجُودَة وْالْغَايْبَة خْلِّيهَا
مَا دَامْتْ الدّْنْيْا لْحْدْ مْهْمَا تْزْهَارْ
لاَ صْغَارْ وْلاَ كْبَارْ تْهْنَّاوْ بِهَا