قلت يوم شعر ف جنابه
واللي وقفنلوا ف بابه
قلت يمكن كلمة مني
ترفع الغمة دي عني
تصحى بيها قلوب نضيفة
ويشوفولي ف يوم وظيفة
أصلي شاب وحالتي صعبة
والحياة دي ظروفها صعبة
واللي ينبش راح يلاقي ....
المهم كتبت شعري
وجبت صاحبي عشان يشوفه
صاحبي قللي كتبت ايه ؟
قلت اسمع قللي رأيك
قاللي قول هات اللي عندك
قلت بسم الله هقول .........
( يا رئيس الدولة كلمة .......... )
صاحبي سمع الكلمة طار
لأجل يقفل ف البيبان
والستاير ع الحيطان
قاللي يخرب بيت مطنك
مالو شعرك بالرياسة
عيش حياتك
مشي حالك
واوعى تدخل يوم برجلك ف السياسة
دا اللي يفهم ميه ميه
والدماغ فيه الكياسه
يا بني يبعد ع السياسه
أصل دي بحورها غويطة
واللي فيها ناس عبيطة
واللي عامل فيها رامبو
يبقى زنبو يا ناس ف جنبو
راح ياخدلو كام مداسه
أصل دا عصر النجاسه
أصل دا عصر الوحوش
عصر ناس ما بيرحموش
عصر شعب ضعيف ف ذله
عصر وحش بياكلو كله
واللي يوم يطلع لسانه
يبقى تتخزق عيونو
يبقى تتخلع ودانو
أصلو يبقى جبان وسافل
يبقى رجعي يبقى فاشل
يبقى ارهابي واصولي
يبقى متطرف وصولي
يبقى خارج ع النظام
واللي يخرج ع النظام انت عارف ايه جزاؤه ؟
قلت ايه ؟
قال جزاؤه انه يعدم ..............
قلت يا رب السلامة
همشي زي الطور في حالي
لو قاللولي اكتب يا شاعر
راح اقول
.
.
.
.
.
( وانا مالي )
بقلم /
محمود جابر