أحسن تكون في المنتصف
قدام مسيرك تتقصف
واللى ورا بيتخطف
النص دايما فيه هدوء
***
خليك جبان عشان تعيش
اوعى تبان تطلع مفيش
اشرب خمور اشرب حشيش
حتى الحرام ممكن تذوق
***
اوعى تقول في يوم غلط
يتقال عليك عقدك فرط
حيدوقوك اكل الظلط
عشان تعيش اوعى تفوق
***
وفر لعيلتك اكلها
وانسى مبادءك كلها
خللى الفران في حقلها
يمكن يجيلها يوم نفوق
***
عيش جعان حتتبعه
اصل الشبع بيوجعه
تشبع تفكر تخلعه
ولا تقول ليا حقوق
***
هو الكبير عايز كده
خليك كده واسمع لده
واوعى فـ يوم تسمع لده
حتى ولو ينده فـ بوق