ربك كريم
موال من الفلكلور الشعبي
للتجديد
بس يارب تعرفو تقروه
/
ربك كريم وحليم بيحن ع الغلبان و الدنيا مالها ياناس ماشية مع الخوان الآخ واكل أخوه قاسم لضهره كمان لا يخاف ف يوم ربنا لا حساب ولا ميزان عينه على ماله باين عليه طمعان ويبات على شبعه واخوه وجاره جعان عيني على شعبنا دَ ياما يقاسي الويل قليل قوي الاغنيا و الفقر مالي الجيل حتى الغني المليان غلبان قليل الحيل مادد إديه لفقرنا حالف ليملى الكيل د مرة واحد قال يا شيخنا انا بَاكُل في الطقة جبنة قريش مع دودها بتشاكل حامد لرب كريم وانا مالي ومشاكل واقول يارب تدوم وأقل انا وَاكِل قاله أقله (التبن ) إصحي لتتاكل عارف مشكالك ايه يا إبننا الغلبان كل مبيهتُّوك تتدارى في الحيطان شقاك وتعبك راح ملا جيبهم العمران مين قال تمكِّنهم في الظلم يا شقيان ربك كريم جابر للي يقول الحق و يراعي ويصابر بدون ميكسر حق لكن إذا حقه هيضيع يقف ويدق زي ما قال ال آي يعرف يقول ال لَأْ ولأمتى يا شعبنا هنداري عجز بميل ودا صبر يا شعبنا ولاَّ دي قلة حيل؟ دا اللي قضاه ربنا الحق لما يضيع نقفله ونخلصه من ايد جبان وعميل منقلشي من عجزنا وانا يعني هاعمل ايه الكلمة ديَّا هروب والجرح مين يداويه هنحط ياللا الايد ف ايد وايد ودا ليه البحر اصله نقط هيتاوي مين يعاديه ربك حليم وكريم بيحن على الغلبان والدنيا قالبة يا ناس ماشية مع الخوان وسكاتنا عن حقنا راح يقلب الميزان
/
/
التبن : أكل المواشي أعزكم الله
الغلبان :بمعنى المسكين في اللهجة المصرية
الطقة :الاكلة الواحدة
دودها : يعني الدود اللي دايما بيخرج مع الجبنة القريش وهي الجبنة البيضا في (مش) مصري بطريقة معينة
كل عام وانتم بكل خير