/
/
/
وأديها فاتت وعدِّت
واتزوَّرت لاْوْراق
خطط وتكتك ونفذ
مِ السد حتى بولاق
وفضيحته كانت ف مسرح
مليان بدود آنفاق
سحب القضاة م اللعب
وعقَّد المسألة
و الباقي حطُّو عليهم
وعوَّص المشكلة
تواكيل ولاد الهباب
خلاها آه معضلة
إندب يا شهري العقاري
دا معدش ليك لازمة
الشرطة جابت بيبانك
ضربوك ميتين جزمة
فاكرين بتهميشك
جابولك الآزمة
فاتت وفاتت وعدِّت
ياللي مشفتش شوف
السرقة كات بالنهار
واللعب ع المكشوف
واللي اتكسف يتحرق
خليك بقى مكسوف
المشكلة الجاية
خبطة معاها الموت
يانفوق يا أُمتنا
يانعيش بدون الصوت
يعني إذا سكتنا
نسكن فبطن الحوت
ناوي على إبنه
يباصيها ع الطاير
من كرهنا لفعلته
راح ناخد الطاهر
وأدينا هانجربه
ونجيبها م الآخر
تلاتين سنة يشتري
ويبيع شقى حالنا
و نعيش بقى عزبته
ولا حالنا ولا مالنا
وآدي الوراثة يا هو
مالها بنا ومالنا
مين قام ومد إيديه
مين يعدل المايل
والديل دا مهما اتعدل
لافف قوي ومايل
مين ينجد المساكين
ويجيبها بجمايل
آدي السواد جايِّنا
و نشوف هانعمل ايه
نختار لمين يكسرو
والباقي خايف ليه
و تُورنا لمَّا يهيج
ساطور وسمِّي عليه
ودمتم مبدعين متحررين