ياريتْ تموت
أنا اللي بيتي أحلى بيتْ
جوّه شارعنا جرِيتْ أبيتْ
عيلتي تمام حافظة وْ يريتْ
كلّ البيوت تصبح لي بيتْ
حتى اسألوا الظابط شليتْ
مش هـ انسى أوّل يوم قابلني
بالحسنى كان .. كان بيعاملني
طلب بطاقتي وْ هدّ طاقتي
واحد قلم ، منّه عِييتْ
بعدين صاحبني وْ راح و جيتْ
و لقيت حماتي شدّه مراتي
و عيالي فوق حاسين آهاتي
عمّال أهاتي .. لكن سُكاتي
جِهْ لماَّ جهْ عمّيِ شليتْ
هدّدْ و مدّدْ ..
شلُّوت مِسدّدْ ..
و الباب خلعته ..
و ضحكت يومها..،
يوم ما بكيتْ
و كفايه إني ..
في البيت كإنّي ..
غريب لإني ..
معْرفشي إنّي ..
و لا حتى أنّي ..
أصلي ابتديت .. أيوه ابتديت
أضحك و اغني ..
عشان يقولوا ..
أنا اللي بيتي أحلى بيت
قُلت ابتديت ..؟!!
قُلْت انتهيتْ
من فين هـ نبدي ،
ناخد و ندِّي
و لمين يريتْ
هيه الحياةْ لسّه الحياهْ؟
ياريت مواجهة لنفسنا
فين حسِّنا؟
فين أهلنا؟
فين لماّ كلْنا فْ بعضنا
مين هدّنا؟
كان من زمان ..
مين قدّنا؟
أنا الغريب .. بس المواطن له حقوق
وانا نفسي ادوق .. جبنة قريش
بتقول مفيش ..؟!
عارف أنا ..
فتحْت شيش
بقشيش كمان؟!
طب ليه نعيش؟
مسمار في عيش؟!
عارف أنا
وانا اللي دايماً جوّه بيت
عارف و عمري ما اشتهيت
طاب ليه اشتهيت؟!
أنا اشتهيت؟!
أيوه اشتهيت
حبة خضار
سلطة خيار
و لمونة مُرّه
واللحمة مَرّة
مرّة بهزار
جات م الحمار
تسعيرة نار
و القلب فار
والقط نام .. جوّه الحصار
بتقول حوار؟!
طب يعني إية كلمة حوار؟
البقرة باتت ..،
و الكلبة ماتتْ
جالها السّعار
و الجار سلخْها ..،
علّقها يا ابا جوّه باب
عشان يبيعها ع الحساب
للواد حسين .. بياع كباب
بتقول هباب؟!
الليلة كوبيا مليانة زيتْ
ياعمّ إوعى .. عمّك شليت
ياخد خبر .. بعدين يقول ليه اشتكيت؟!
العيشة حلوة ..،
والناس تمام
يا ناس حرام
طبْ قولوا يا اولاد الحلال
المدرسة ..قولوا شِمعنا
هيّة دراسة .. هيّة فراسة ..
هية شطارة ، هيه وزارة
لأ مش تعاسة .. أوِ انتكاسة
و دروس خصوص هاجمة بشراسة
بتقول خباسة؟!
بتقول دساسة؟!
بتقول عقولنا لزماً تثور؟
بلاش نلفّ ، أو ندورْ
عايز صراحة؟
الميس في راحة
و انت فْ مناحة
داير في ساقية
و تبقى باقية ..
عليك حكومتك .. لو يعدّي نهار عليك
منك .. إليك
خد لك قرار
لو بالفرار
أناعقلي طارْ
من كام وِرِيتْ
الرحمة بينا ..
صلي على الهادي نبينا
رحمة رحيم ساترة البلاوي
و لاّ الطبيب تذكرته علْيت
مستشفى جارْنا .. باع الكلاوي
و لو انت غاوي
ع الشر ناوي
افتح قهاوي .. سمسر غناوي
و الزم في بيت
لو حتى فيه عمّك شليت
يكفيك رضاه .. عنك ياريت
بتقول ياريت؟!
يا تعيش سكوت ..
يا تكون ريموت جوه البيوت
يا إما ياخدك ع التابوت
مليش مصالح
فاسد و صالح
الكل خاصمك
شوف مين يصالح؟
الزحمة عدت في الكابوس
عدي البسوس
ارجع لبيتك
لو حتى تصبح من غير فلوس
لو حتى قابلك
عمك شليت
غَنِي وْ مِبَسِّم
ع الطبلة قسِّم
ملفوف و سيكا
بلاش يا ويكا
يا يقوم في بختك
و الحال لـَبَختك
بنتك و أختك
عايزين سلامتك
وانت اللي عارفه
امسك بطرفه
متقولش حاجة
و لا أي حاجة
عشان ياريت
تفضل في بيت
و يقولوا عنك
مصري وْ سعيت
رفضت كذبك .. بقيت أمير
أقصد وزير .. ولاّ غفير
مُهمّ تفضل زي الريموت
ملكشي صوت
بسّ بجمالك .. ريّحت بالك
و عرفت إنك .. مهماً تطول
مهما تقول
الشمس غابت .. عايزة الأفول
عايزاك يدوب تمسك قلم
لو حتى تصرخ م الألم
البحر زاط
و الشطّ زاطْ
قاعدين بكيفنا ع البلاط
مش قلتلك .. خلّيك بشوش
إياك تحوش
لو مرة شفت الكَندرةْ
بتطير لفوق
ع المندرة
اضحك و كسّر بسكويت
و الزم حدودك
انسى الزمان
ياللي انت كنت بتاع زمان
انسى بمزاجك
خليك رضيت
قول غنوة حلوة ..،
و كلمة حلوة
قول ياللاّ قول
مُهمّ تفضل زي الريموت
ملكشي صوت
وانت اللي بيتك أحلى البيوت
ياريت تموت
ياريتْ
تـ..
مـ ..
و ..
تْ
.....
حفظ الله مصر حرة قوية آمنة برجالها المخلصين
و تحية إلى الثورة البيضاء التي قام بها شباب مصر الثائر