أَحٌمَد يَاسِينٌ
رايح يصلى الفجر
مليان بالإيمان
دفيان بالسكون
والسبحة فى يده
فوق كرسى يتحرك
بقلبه الحنون
أتاري سهم الغدر مستني
والخاين يخون
نهر البكا يجرى على الرمله
فوق غصن الزيتون
لون السواد يفرش
يغطي كل لون
شايفه فى قلوب الناس
فى حبات العيون
حتى الحمام ماحط فوق عشه
شاف عشه يهون
الكون بَديْ له غريب
قال مالك يا كون ؟
………………..
مين اللى باعك ياصاحبى ؟
والقدر مكتوب
مين جاله قلب يشوفك
و إنت مالي قلوب
ماشي بتطلب شهادتك
وتعدي ياما خطوب
لكن فى يومها انكتب لك
وكل شيء محسوب
تيجى الملايكة تِزِفَك
تقول كفايه يادوب
وَفيت بوعدك لربك
ويوم المنى المطلوب
انك تنال الشهادة
وتروى أرضك بدمك
أصبحت رمز لجهادنا
وعرضنا المسلوب
……………………
بسم الله وبحق الفاتحه
وآل عمران
وبحق يس
بسبع مثاني من القرآن
هما الخالدين
وبإذن الله وبوعده الحق
ودعا الملايين
هتنول الجنه
مليون مبروك يا أحمد يايسين
كتبت يوم الاثنين 22 مارس 2004
يوم استشهاد الشهيد احمد ياسين
د. هانى ابوالفتوح